ҚОСТАНАЙДАН ҮШ МЕДАЛЬ ЖЕҢІП АЛДЫ

03.10.2024

Марғұлан университетінің спортшылары түрлі жарыстарда бақ сынап, оқу орнымыздың атын шығаруда. Жақында Қостанай облысына бокстан жастар арасындағы халықаралық турнир аяқталып, жеңімпаздары анықталды. Аталған турнирге барған үш боксшының үшеуі де медальмен оралды. Олар - Дихан Шайқыбеков, Әлихан Ақпанбаев, Ислам Машкентаев сынды спортшылар. Ислам 54 келі салмақта бірінші орынды жеңіп алса, Әлихан 60 келіде жұдырықтасып екінші орынға ие болды. Сондай-ақ, 80 келі салмақта өнер көрсеткен Дихан үшінші орын алып, қола медальді қоржынға салды. Жаттықтырушылары - Ривхат Авазбаекиев.
Халықаралық турнирге Германия, Польша, Өзбекстан, Ресей, Қырғызстан, Тәжікстан, Әзербайжан елдерінен жүздеген спортшы келіп, шаршы алаңда сынға түсті.

-Біздің спортшылар өте жақсы өнер көрсетіп, облыс намысын абыроймен қорғады. Спортшылар қазір демалу үстінде. Енді бір аптадан кейін Шымкентке барып, оқу-сауықтыру жиынына қатысады. Содан кейін Қазақстан чемпионатына дайындаламыз, - деді жаттықтырушы Ривхат Авазбаекиев.