УНИВЕРСИТЕТ АУЛАСЫНА ШЫРША КӨШЕТТЕРІ ОТЫРҒЫЗЫЛДЫ

11.11.2023

Әлкей Марғұлан атындағы Павлодар педагогикалық университетінде оқу орданың айналасын  көріктендіру және абаттандыру мақсатында экологиялық акциялары жиі ұйымдастырылып тұрады. Бүгін ұстаздар ордасының ұжымы сенбілік шарасына орай №5 оқу ғимаратының ауласына бір топ шырша ағашын отырғызды. Жасыл көшеттерді отырғызу шарасына университет ректоры Жанбол Жилбаев, оқу орнының басқарма мүшелері, жоғары мектеп декандары және студенттер қатысты.

Марғұлан университетінің ауласына отырғызылған шыршалар өзіндік күтімді қажет етеді. Университеттің биолог-ғалымдарының айтуынша, шыршаларды қыс түсіп, қар жауғанша күн сайын суарып отыру керек. Себебі, осы уақыттарда жас шыбықтардың тамыры жерге сіңеді. Ал қар түсіп, жер қатқаннан кейін ешқандай су құйылмайды. Себебі, қыс уақытында шырша ағаштарының сумен қоректенуі тоқтайды. Көктемде қар еріп, күн жылығанда суаруды қайта жалғастыруға болады.

Университет ауласын көгалдандыру – маңызды бағыттардың бірі. Себебі, аулаға осындай жас көшеттерді отырғызып, оны күтіп өсіру – экологиялық тазалықты сақтаудың бірден-бір кепілі.