ПАВЛОДАР ПЕДАГОГИКАЛЫҚ УНИВЕРСИТЕТІ 10 ОҚУШЫҒА ГРАНТ БЕРДІ

07.04.2022

Республикалық пән олимпиадасының облыстық кезеңінің жеңімпазы атанған 10 оқушыға Павлодар педагогикалық университетіне тегін оқу гранты берілді.  Грнаттарды ППУ ректоры Жанбол Жилбаев табыстап, жеңімпаз оқушыларды келесі оқу жылының басында осы университеттің студенті болуға шақырды. Айта кету керек, биыл ұстаздар ұстаханасы атаған педуниверситеттің 60 жылдығына орай дарынды оқушыларға арналған гранттар саны да ұлғайып отыр.

- Өңіріміздегі әртүрлі білім беру мекемелерінде жұмыс  істейтін педагогтардың 80 пайызы Павлодар педагогикалық университетінің түлектері. Павлодар облысының олимпиадалық командасы соңғы 20 жылдан бері  республикадан бірінші орынды бермей келеді. Бұрын 1-4 курс студенттері арасында 77 ғана «Алтын белгі» иегері  болған. Ал былтыр біздің университетке 100-ден астам «Алтын белгі» иегері түсті. Осы көрсеткіштер оқушылардың білім беру саласына деген көзқарасы өзгеріп, осы салаға қызығушылығы артқанын білдіреді. Бүгін Павлодар педагогикалық университетінің грантын жеңіп алған балаларды ұжымның атынан, профессорлық құрамның атынан шын жүректен құттықтаймын. Сіздерді алдағы оқу жылының басында осы университетке оқуға келеді деп күтеміз, - деді Жанбол Октябрьұлы.

Пән олимпиадасы «Ертіс дарыны» өңірлік қосымша білім беру оқу-әдістемелік орталығының қолдауымен өтті. Оқушыларды марапаттау шарасына аталған орталық директоры Азамат Шаймұрат қатысып, жеңімпаз оқушыларды дайындаған мұғалімдерге Алғыс хаттар табыстады.

- Сіздерді биылғы 60 жылдық мерейтоймен құттықтаймын. Осы мерейтой қарсаңында оқушыларға берілетін гранттар санын 10 грантқа дейін көбейтіп отыр екенсіздер. Бұл білімге құштар жастарға берілген үлкен мүмкіндік. Жеңімпаздар арасында ауыл мектептерінде оқитын оқушылар да бар. Бұл ауыл балаларын қолдаудың нақты көрінісі деп білеміз. Осы балалардың барлығы күзде осы университетке түседі деп ойлаймын. Қазақта «ұстаздық еткен жалықпас» деген жақсы сөз бар. Осы оқушыларды дайындаған ұстаздарға да зор алғыс білдіремін, - деді Азамат Боранбайұлы.

Өз кезегінде грант иегері атанған оқушылар да өз ұстаздарына және естен кетпес қуаныш сыйлаған ППУ ұжымына алғыстарын білдірді.

- Қазақстаң заңғар жаушысы Мұхтар Әуезов: «Адам мен адамды теңестіретін білім» деген екен. Мектептен алған сапалы білімімнің арқасында олимпиада жеңімпазы атанып, грант иегері болдым. Бізге осындай қолдау көрсеткен өзіндік даму тарихы бар Павлодар педагогикалық университетінің ұжымына алғыс білдіремін, - деді Ы.Алтынсарин атындағы облыстық гимназия-интернатының оқушысы Айханым Хафиз.