ЖОҒАРЫ КОЛЛЕДЖДЕ СОҢҒЫ ҚОҢЫРАУ СОҒЫЛДЫ

26.05.2022

М.Қанапиянов атындағы жоғары колледжде соңғы қоңыраудың салтанатты рәсімі өтті.

Колледждегі соңғы қоңырау дәстүрлі сапта емес, "Оскар жүлдесі" сыйлығын тапсыру салтанатының шығармашылық форматында өтті.

Колледж студенттері мен түлектерін құттықтау үшін қызыл кілемге директор, орынбасарлары мен күндізгі бөлім меңгерушілері шақырылды. Келесі кезекте колледж түлектері мен олардың кураторлары жұлдызды жолға шықты.

М.Қанапиянов атындағы жоғары колледжінің директоры Жұмабай Мұхаметалин түлектер, оқытушылар мен студенттер алдында құттықтау сөз сөйледі. Шәкірттерін үнемі қолдап, оларға терең білім, жақсы тәрбие бергені үшін ұстаздарға алғысын білдірді.

"Құрметті түлектеріміз, бүгін сіздер колледжді бітіріп, үлкен өмірге қадам басып отырсыздар. Қай жерде болсаңыз да, қай салада қызмет етсеңіз де, осында алған білімдеріңізді әрқашан Тәуелсіз Қазақстанның игілігі мен гүлденуіне жұмсайтындарыңызға сенемін. Сіздерге зор денсаулық, ақ жол тілеймін!», – деді Жұмабай Аманқұлұлы.

Директордың орынбасарлары Досымбекова Райхан Наурызбайқызы, Елубаева Күнсұлу Петровна, Варзегова Жанна Ораловна, Нұрғалиева Қаламқас Ертісбайқызы, күндізгі бөлім басшылары Мәденова Мейрамгүл Шаймарданқызы, Кенжеғалин Алмас Қайыргелдіұлы, Жақыпова Самал Болатқызы және Әбсаттарова Бахытгүл Серікқалиқызы ұстаздар мен студенттерді атаулы күнмен құттықтады.

Мереке барысында түрлі салада жетістіктерге жеткен колледждің үздік студенттері марапатталды. Үздік студенттер «Колледждің интеллектуалды мақтанышы», «Жыл белсендісі», «Жылдың белсенді тобы», «Олимпиада үміттері», «Колледждің жұлдызды топ жетекшілері» номинациялары бойынша марапатталды.

Түлектерді төменгі курс оқушылары құттықтады. Олар мерекеге керемет көркем қойылымдар, әндер мен билер дайындады.

Өз кезегінде түлектер ұстаздарына қамқорлық пен шыдамдылық үшін алғыстарын білдіріп, емтихандарды сәтті тапсыруға бар күштерін салатындарын жеткізді. Олар ұстаздарына деген сүйіспеншіліктері мен құрметтерін айтып, өмір бойы колледж туралы жақсы естеліктерді сақтайтындарын жеткізді.