ҰСТАЗҒА ҚҰРМЕТ – ҰЛЫЛЫҚТЫҢ БЕЛГІСІ!

05.10.2023

Әлкей Марғұлан атындағы Павлодар педагогикалық университеті үшін бүгінгі күннің мәні мен маңызы зор. Себебі, біздің оқу орын Ертіс-Баян өңіріндегі ұстаздардың жалғыз қара шаңырағы. Сондықтан, ұстаз мерекесі - барша университет мерекесі деп білеміз.

Бүгін ұстаздардың кәсіби мерекесіне орай «Шаңырақ» халық шығармашылығы орталығында мерекелік концерт өтті. Оған университеттің тәрбие және әлеуметтік мәселелер жөніндегі проректоры Серік Ильясов қатысып, ҚР Ғылым және жоғары білім министрі Саясат Нұрбектің құттықтау хатын оқып, ақ сәлемін жеткізді. Содан соң оқу ордасында ұзақ жыл табанды әрі табысты еңбек етіп жүрген оқытушыларға университет ректоры Жанбол Жилбаевтың Алғыс хатын табыстады. Сонымен қатар, бастауыш кәсіподақ ұйымының төрайымы Роза Жаева бірқатар қызметкерді Білім және ғылым қызметкерлерінің Қазақстандық салалық кәсіптік одағы Құрмет грамотасымен марапаттады.

Бүгінгі ұстаздардың кәсіби мерекесіне орай марапат алғандардың бірі – «Тарих» білім беру бағдарламасының қауымдастырылған профессоры, PhD докторы Айгүл Садықова.

- Өзім осы университеттің түлегімін, 2005 жылы бітіріп, ұстаздық жолға түстім. Марғұлан университеті маған көп нәрсе үйретті, білім нәрімен сусындатты, тағылымды тәрбие берді. Ғылым жолына түстім. Сондықтан маған сабақ берген ұстаздарыма алғысым шексіз. Бүгінгі ұстаздар күніне орай Марғұлан университетіндегі барша әріптестерімді шын жүректен құттықтаймын, еңбектеріңіз жемісті болсын. «Шәкіртісіз ұстаз тұл» дейді. Ендеше, сіздердің аттарыңызды шығаратын білімді шәкірттеріңіз көп болсын, - деді ол.

Мерекелік шара барысында университет түлектері және дарынды студенттері әсем әуен, көңілді күй, мың бұралған биден тарту жасап, кештің сәнін келтірді.