УНИВЕРСИТЕТ ТАРИХЫНАН СЫР ШЕРТТІ

20.05.2022

Е.Бекмаханов атындағы ғылыми кітапханада «Сүйікті білім ордам» атты дөңгелек үстел өтті. Шара университеттің биылғы 60 жылдық мерейтойына арналды. Шараның мақсаты – студенттерді университеттің тарихымен таныстыру, таңдаған мамандықтарын сүюге және құрметтеуге шақыру, ұстаздық қасиеттерді бойларына дарыта білу, педагогикалық шеберлік пен әдепті игеруге тәрбиелеу. Студенттермен кездесуге Павлодар педагогикалық университетінде ұзақ жыл еңбек еткен ардагер ұстаздар келді. Атап айтқанда, биология ғылымдарының докторы, профессор Қайырбай Базарбеков, математика және физика кафедрасының профессоры, педагогикалық ғылымдарының кандидаты, доцент Бахтияр Найманов, педагогика жоғары мектебінің профессоры, педагогика ғылымдарының докторы Айгерім Нұрғалиева сынды ұлағатты ұстаздар университеттің өткен тарихынан сыр шертті.

- Білім ордасының тарих қойнауында қаншама сыр жатыр. Біздің оқу орынның тарихы терең. Бүгінде арамызда университеттің дамуына көп үлес қосып, негізін қалаған, есімдері алтын әріптермен жазылған ұлағатты ұстаздарымыз бар. Олардың тәлім-тәрбие беру бағытында еңбектері зор. Төрімізді жайнатып отырған құрметті қонақтарымыз 60 жылға жуық қызмет етіп, ұстаздық жолында шәкірттерін білім нәрімен сусындатып келеді. Бүгінгі кездесуге қонақ ретінде келіп, жастармен өз ойларын юөліскен ардагер ұстаздарға алғыс білдіреміз, - деді кітапхана қызметкері Тұсын Мусина.

Жиналған қауымның назарына «Тарих беттері» атты кітап көрмесі және «ППУ тарихынан» слайд ұсынылды.