Универсиада жеңімпаздары мен жүлдегерлері марапатталды

17.06.2021

Университет ректоры, басқарма төрағасы – Жанбол Жилбаев Түркістан және Қостанай қалаларында өткен ХІ жазғы Универсиаданың жеңімпаздары мен жүлдегерлерін марапаттады.

Бүгін Павлодар педагогикалық университетінде ХІ жазғы Универсиададан жүлделі оралған ППУ спортшылары ректор Алғыс хаты мен ақшалай сертификаттарға ие болды. Байрақты бәсекеде ППУ-дың намысын қорғап, Универсиада ойындарында жеткен жетістіктері үшін Ж.Жилбаев алғысын білдіріп, ыстық ықыласын жеткізді.

Атап айтсақ, Универсиада жүлдегерлері қатарында Өнер және спорт жоғары мектебінің студенттері: ФКС-32  тобынан М. Бовкун мен А. Журбина (Пауэрифтингтен 1-орын), ФКС-41 тобынан Е.Ерғантай мен Ж. Белялова (қазақ күресінен 2 және 3 орын), ФКС-31 тобынан М. Нұрмұхамбетова (тоғызқұмалақтан 3-орын), Ж. Амрен (ФКС-11), А. Коппаева (ФКС-13) (Әйелдер арасында еркін күресінен 3-орын).

Универсиадада орын алған студенттерді салтанатты марапаттау рәсімінен жаттықтырушылар да қалыс қалмады. Осылайша шәкірттерін жеңіс тұғырына жетелеген бапкерлер, Өнер және спорт жоғары мектебінің оқытушылары Жанар Усина мен Қайрат Темірболатов ЖОО-ға сіңірген еңбегі үшін ректор Алғыс хатымен марапатталды.

Бізді алда әлі талай белестер мен шыңдар күтіп тұр... Осы жолы Универсиадада қарсыластарымызға дес бермедік. Алайда, жарысқа университет атынан аз адам қатысқандықтан, жалпыкомандалық есепте бірінші орынды беріп қойдық, келесі жолы Бас жүлдені алатынымызға күмәнім жоқ, - дейді пауэрлифтингтен Универсиада жеңімпазы Анастасия Журбина.  

Жиын соңында университет ректоры Ж.Жилбаев алдағы уақытта өтетін жарыстарға сәттілік тілеп, жерлестерімізді жеңісімен тағы бір мәрте құттықтады. Өз кезегінде спортшыларымыз алдағы олимпиада ойындарында да жоғары көрсеткішке қол жеткізіп, еліміздің көк байрағын желбірететіндеріне сенім білдірді.