ҰЛТТЫҚ СПОРТ ҮЗДІКТЕРІ МАРАПАТТАЛДЫ

15.03.2024

Бүгін Әлкен Марғұлан атындағы Павлодар педагогикалық университетінде «Nauryziada-2024» ұлттық спорт турнирінің марапаттау салтанаты өтті. Шараға стратегиялық даму және әлеуметтік жұмыс жөніндегі проректоры Серік Ильясов қатысып, жеңімпаздарды құттықтады. Марғұлан университетінде мұндай турнир биыл алғаш рет өтіп отыр, жарыс академик Әлкей Марғұланнның 120 жылдығына орай ұйымдастырылды.

Жарысқа Марғұлан университеті мен М.Қанапиянов атындағы жоғары колледжі, Торайғыров университеті мен коллежі, ИнЕУ мен колледжі, Екібастұз инженерлік техникалық институты командалары бақ сынады. Турнир бір аптаға жалғасты. Осы уақытта аталған оқу орындардың ұлдар және қыздар командасы асық ату, тоғызқұмалақ және қазақ күресі спорт түрлерінен бақ сынады.

- Мен асық атумен бала кезден айналысамын және көптеген асық ойыны жарыстарына қатысып келемін. Бұл жолғы жарыс өте қызықты әрі жоғары деңгейде өтті. Республикалық турнирде бірге өнер көрсетіп жүрген балалар да болды. Олармен финалда ойнап, жеңіске жеттік,-дейді Торайғыров университетінің студенті Аябек Серік.

Жарыс қорытынлысы бойынша, командалық есепте Әлкей Марғұлан атындағы Павлодар педагогикалық университеті топ жарып, ауыспалы кубокқа ие болды. Екінші орынды Торайғыров Университеті иеленсе, үздік үштікті Инновациялық Еуразия университеті түйіндеді.