ТАШКЕНТТІК ОҚЫТУШЫЛАР МАРҒҰЛАН УНИВЕРСИТЕТІНЕ КЕЛДІ

13.05.2024

Олар – Низами атындағы Ташкент мемлекеттік педагогикалық университетінің ғалымдары, т.ғ.к., доцент, тарих факультетінің деканы Уктамжон Усманов және э.ғ.к., доцент, «Білім беру менеджменті» кафедрасының меңгерушісі Нодира Саидахмедова. Қонақтар Қаныш Сәтбаевтың 125 жылдығына арналған «Ғұламалар: Қаныш Сәтбаев пен Әлкей Марғұлан» халықаралық ғылыми-практикалық конференциясының пленарлық бөлімінде баяндама жасады. Сондай-ақ, «Тарих» ББ докторанты Расул Килаштың докторлық диссертациясын (PhD) талқылау жөніндегі отырысқа қатысып, бакалавриат және магистратура студенттерімен кездесті.
Шетелдік әріптестер Павлодар облысының киелі жерлері бойынша экспедицияға қатысты. Экспедиция аясында гуманитарлық ғылымдар жоғары мектебінің деканы, т. ғ. к., қауымдастырылған профессор Анар Каримова, "Тарих" ББ жетекшісі Бауыржан Әбдірахманов және профессор-оқытушылар құрамымен бірге «Ертіс орманы» мемлекеттік орман табиғи резерватының аумағында орналасқан көрікті жерлерге барды. Атап айтқанда Шарбақты ауданындағы Ғабдул Уахит Хазірет кесенесін тамашалады. Сондай-ақ, «Экология жылы» және «Жасыл аймақ» акциясы аясында қонақтар ағаш көшеттерін отырғызды.
Айта кетейік, 2023 жылдың ақпан айында Ғылыми жұмыс жөніндегі проректор Бауыржан Есенгелдин мен "Тарих" ББ басшысы Бауыржан Әбдірахмановтың Низами атындағы Ташкент университетіне іс-сапармен барып, университеттер арасындағы ынтымақтастық туралы шартқа қол қойды. Оның шеңберінде студенттермен, профессорлық-оқытушылық кадрлармен және ғылыми қызметкерлермен тәжірибе алмасу, зерттеу және инновациялық жобаларды іске асыру, бірлескен білім беру бағдарламаларын әзірлеу және құрастыру саласындағы ынтымақтастықты жүзеге асыру көзделген.