Т.К. Шаяхметовты еске алуға арналған бокстан дәстүрлі турнир өтті

04.06.2021

Павлодар педагогикалық университетінде студенттер арасында 29-30 маусым аралығында бокстан Павлодар педагогикалық институтының бұрынғы ректоры Т.К. Шаяхметовты еске алуға арналған қалалық дәстүрлі ХХІ ашық турнирі өтті. Турнирге "Гренада" бокс клубы, Балалар мен жасөспірімдер орталығы, "Мирас" спорт клубы, Торайғыров Университеті мен ППУ боксшылары – барлығы 48 спортшы қатысты.   

Айта кетсек, еліміздегі эпидемиологиялық жағдайға байланысты турнир жанкүйерлердің шектеулі санымен қысқартылған бағдарлама бойынша өткізілді. Бұған қарамастан, боксшылар арасындағы қызу тартыс нәтижелі болып, көрермендердің делебесін қоздырды. Жалпы командалық есепте Бас жүлде ППУ студенттеріне берілді. Ал ІІ және ІІІ жүлделі орындарды "Гренада" және "Торайғыров университеті" командалары бөлісті. Жарыс кезінде қазылар алқасы спортшылардың кәсібилігін, техникалық шеберлігін, сондай-ақ қарсыласқа қарсы тұру қабілетін сынап бақты. Ал жеке есепте сынақтың нормалары мен талаптарына сәйкес келесі жеңімпаздар анықталды:  

57 кг жеңіл салмақ дәрежесінде ППУ-дың ҚтМӘ-11 тобының студенті А.Ахмет – І орынды иеленді. 60 кг салмақ дәрежесінде ФКС-11 тобының студенті Орын Ерзат жеңімпаз атанса, ал 63 кг орташа жеңіл салмақ дәрежесінде ҚтМӘ-11 тобының студенті Мақсұт Нариман І орынды қанжығасына байлады.

Кәсіпқой боксшылар арасында А тобында спорт шебері, 63 кг салмақ дәрежесінде өнер көрсеткен Шутелов Айбат бүкіл қарсыластарынан басым түссе, 69 кг салмақта жарысқа қатысқан Мұхтаров Әділбек және 81 келі жартылай ауыр салмақта қолғап түйістірген Ерназаров Ернар өз санаттарында қарсыластарын сан соқтырып, рингтің жеңімпазы атанды.  

Мұндай іс-шаралардың университет қабырғасында көптеп өткізілуі жоғары оқу орындары деңгейінде өткізілетін спорттың дамуына, спортшылардың кәсіби шеберлігін арттыруға және жас спортшылардың кәсіптік салада мансаптық жетілуіне, біліктілігін арттыруға ықпал етеді. Т.К. Шаяхметовты  еске алуға арналған қалалық XI дәстүрлі турнирінде жеңімпаз атанған спортшыларымызды шын жүректен құттықтаймыз!