СТУДЕНТТІК ӨМІР БАСТАУЫНДА: МАРҒЛАН УНИВЕРСИТЕТІ БІРІНШІ КУРС СТУДЕНТТЕРІНІҢ САЛТАНАТТЫ ЖИЫНЫ ӨТТІ

02.09.2024

Әлкей Марғұлан атындағы Павлодар педагогикалық университетінде бірінші курс студенттеріне арналған дәстүрлі салтанатты жиын өтті. Биылғы жылдың бірінші курс студенттері, ұстаздар, ата-аналар, университет басшылығы және құрметті қонақтар бас ғимарат алдындағы алаңға жиналды.

Биылғы жылы Павлодар педагогикалық университетіне бакалавриат, магистратура және докторантураға 1621 талапкер түсті, бұл өткен жылмен салыстырғанда 174-ке көп.

Марғұлан университетінің Басқарма төрағасы - ректор міндетін атқарушы – Жанбол Жылбаев ұстаздар мен студенттерді жаңа оқу жылының басталуымен құттықтады.

Биыл біздің оқу орынымызға 1735 талапкер қабылданды, бұл былтырғы көрсеткіштерге қарағанда 174 талапкерге көбейгендігін растайды. 500-ге жуық студент мемлекеттік грантқа ие болды. Олардың ішінде 32 «Алтын белгі» иегерлері, әртүрлі олимпиада жеңімпаздары, спорттық сайыстардың жүлдегерлері де бар. Біз мемлекеттік грантқа қолы жетпеген кейбір балаларды да назардан тыс қалдырған жоқпыз. 19 талапкер «Қазақстан халқына» қоғамдық қорының, 41 талапкер университет грантының, 25 жергілікті атқарушы орган гранттарының иегері атанып отыр. Оған қоса, Мемлекеттік «Серпін-2050» бағдарламасы бойынша еліміздің оңтүстік өңірлерінен де талапкерлер қатарымызды толықтырды – деді Жанбол Октябрьұлы.

Студенттер мен ұстаздарды Білім күнімен құттықтаған құрметті қонақтар: Павлодар облысы білім және ғылым қызметкерлері салалық кәсіподақ ұйымының төрағасы Гүлбарам Наурызбаева, «Ақылдастар алқасы» ҚБ төрағасы Бақтияр Найманов. Университетіміздің белсенділері университеттің студенттік омбудсмені Іңкәр Қуандыққызы мен Студенттік парламенттің президенті Аян Давлетяров студенттерге жылы лебіздерін жеткізді.

Университеттің әнұранын студенттік филармонияның вокалистері Арсен Шорманов пен Амина орындады. Қалыптасқан дәстүр бойынша жоғары курс студенттері жаңадан қосылған «марғұландықтарға» университет туын табыстады.

Павлодар педагогикалық университетінде бірінші курс студенттері студенттік ант қабылдады.

Салтанатты сап Марғұлан университеті ұжымдарының орындауындағы концерттік бағдарламамен жалғасты.