СТУДЕНТТЕР ӘН БАЙҚАУЫНЫҢ ЖҮЛДЕГЕРЛЕРІ АТАНДЫ

28.02.2023

Әлкей Марғұлан университеті Өнер және спорт жоғары мектебі «Музыкалық білім беру» бағдарламасының студенттері Әмина Сағындыкова мен Әлнұр Уахит әйгілі жерлесіміз, композитор, Қазақ КСР-нің еңбек сіңірген өнер қайраткері Садық Кәрімбаевтың 105 жылдық мерейтойына арналған «Әншіл жүрек» атты облыстық әншілер байқауына қатысып, жүлделерге ие болды.

Өнер байқауы Г.Н. Потанин атындағы облыстық тарихи-өлкетану музейінде Майра Шамсутдинова атындағы ән-өнер шығармашылық музейінің ұйымдастыруымен және Павлодар қаласы «Музыкалық колледж- дарынды балаларға арналған музыкалық мектеп- интернатының қолдауымен өткізілді. Сайыстың мақсаты - Садық Кәрімбаевтың шығармашылығын елге насихаттау.

Сайыста өңіріміздің 16 әншісі бақ сынады. Өнерпаздар С.Кәрімбаевтың әндерімен қоса халық композиторларының әндерін орындады. Байқау 2 бағыт бойынша өтті: «Дәстүрлі ән» және «Вокал».

МБ-21 тобының студенті Әмина Сағындықова «Вокал» бағытына қатысып, рояльдың сүйемелдеуімен жанды дауыста 2 ән орындады. Бірінші орындаған әні - «Ақ ерке» әні, ал екінші - «Асыл арман» әні. МБ-31қ тобының студенті Уахит Әлнұр «Баян тау еркесі», «Баянауыл вальсі» әндерін орындады. Концертмейстер: Семикин Валерий Александрович. Студенттер байқауға дайындықты рояльдің сүйемелдеумен жасады. Олардың жетекшісі - Кисатова Салтанат Тасболатқызы әннің дұрыс айтылуын, сахнаның мәдениетімен таныстырып, бағыт бағдар беріп отырды.

Байқау қорытындысы мен әділқазылар алқасының шешіміне сәйкес «Вокал» бағыты бойынша Сағындыкова Әмина II- орынға ие болды. Ал Уахит Әлнұр арнайы жүлдегер атанды.

«Қазақ КСР-нің еңбек сіңірген өнер қайраткері, композитор Садық Кәрімбаевтың 105-жылдық мерейтойына арналған «Әншіл жүрек» атты Облыстық әншілер байқауына қатысқаныма өте қуаныштымын. Осындай байқаулар біздің орындаушылық шеберлігімізді шындауға жаңа мүмкіндіктер ашады», - дейді Сағындыкова Әмина.