МАРҒҰЛАН УНИВЕРСИТЕТІНДЕ «STUDENT STREET» СТУДЕНТТІК ҰЙЫМДАР ЖӘРМЕҢКЕСІ ӨТТІ

20.09.2023

Бүгін Марғұлан университетінде «STUDENT STREET» атты студенттік ұйымдар жәрмеңкесі өтті. Басты мақсаты – студенттік ұйымдар өздерін бірінші курс студенттеріне таныстыру. Міне, осы арқылы олар университет табалдырығын енді аттаған белсенді жастармен толықтырмақ.
Шараға Марғұлан университетінің тәрбие жұмысы және әлеуметтік мәселелері жөніндегі проректоры Серік Ильясов қатысып, көңілді кешті өзінің құттықтауымен бастады.
- Құрметті студенттер! Сіздерді студенттік жәрмеңкенің ашылуымен құттықтаймын. Студенттік өмір тек оқу ғана емес, сонымен қатар әртүрлі істермен айналысып, өзін дамыту керек. Бізде әртүрлі клубтар бар. Сондықтан сіздерді өздеріңізге ұнайтын клубтарды табуға шақырамын, - деді.

Атап өту керек, Марғұлан университетінің жанында 17 студенттік ұйым бар. Олардың әрқайсысы әртүрлі бағытты бетке алып, студенттерді дамыту мақсатында жұмыс істеуде.
Солардың бірі-жаңадан құрылған «BIGFAM community group» студенттік ұйымы. Аталған ұйымның төрағасы Қалихан Темірланның айтуынша, басты мақсаты бірінші және екінші курс студенттерінің дамуына қолдау көрсету.
-Біз студенттердің жалпы дамуымен айналысамыз. Яғни, олардың бір орта қалыптастырып, кітап оқуына, спортпен шұғылдануына, өнерін шыңдауына көмек береміз. Біз әр апта сайын іс-шара және семинарлар өткізіп тұрамыз. Біздің бастамаларымызға мұғалімдер де қолдау көрсетіп, өздерінің тәжірибелерімен бөліседі. Жалпы мұғалім жан-жақты болуы шарт. Және студент қарап жатпай, бос уақытта әртүрлі істермен шұғылдануы керек,-дейді Қалихан Темірлан.