«STUDENT STREET» АТТЫ СТУДЕНТТІК ҰЙЫМДАР ЖӘРМЕҢКЕСІ ӨТТІ

20.09.2022

Бүгін Павлодар педагогикалық университетінде «Student street» атты студенттік ұйымдардың жәрмеңкесі өтті. Жәрмеңкеге жастар істері жөніндегі комитеті,  «Ақиқат» және «Веритас» дебаттық клубтары, «Серпін іскерлері» ұйымы,  «Ғибрат» шығармашылық бірлестігі, «Жастар рухы» Жастар қанаты, «Энактус»,  «Саналы ұрпақ», «Құс қанат ғұмыр», «Жайдарман», «Лотос» сияқты әртүрлі студенттік ұйымдар қатысты. Басты мақсаты – ұйым мүшелері өздерінің шығармашылық бағыттарын таныстыру, бұған дейін атқарған жұмыстары мен жеткен жетістіктерін көрсету. Сол арқылы биыл бірінші курсқа қабылданған студенттерді өз қатарларына шақыру болды.

Шараның шымылдығын ППУ тәрбие жұмысы және әлеуметтік мәселелер жөніндегі проректор Мақсат Нығманов ашып, барша студенттерді оқу жылының басталуымен құттықтап, барлық студенттік ұйымдарға сәттілік тіледі.

-Құрметті бірінші курс студенттері! Сіздерді студенттік өмірге қадам басуларыңызбен құттықтаймын.  Студенттік өмірлеріңіз мәнді де сәнді әрі қызықты өтсін. Сіздер оқуда ғана емес, сабақтан тыс уақытта да белсенді болыңыздар. Сонымен қатар, өзіміздің ұстаздар ордасының шын патриоты болуға тілектеспін. Біз студенттеріміздің өзін-өзі шыңдау және көшбасшылық қасиеттерін дамыту үшін барлық жағдайды жасаймыз. Қазір олар университеттің үздік дәстүрлерін сақтай отырып, республикалық деңгейде көшбасшылар қатарынан көрінуде. Бірінші курсқа енді келген студенттерді де университеттің абыройын асырып, туымызды әрдайым биік ұстауға шақырамын, - деді Мақсат Сейіткенұлы.

Студенттік ұйымдар жәрмеңкесінде өздерін ерекше көрсеткен белсендідердің бірі – «Серпін іскерлері» ұйымы. Ұйым төрайымы Аружан Ғалымжанқызының сөзінше, «Серпін-2050» бағдарламасы аясында оңтүстік жастарын солтүстік облыстардағы жоғары оқу орындарына түсуге үгіт-насихат жұмысын жүргізеді. Сонымен қатар, әртүрлі бағыттағы қоғамдық және қайырымдылық жұмыстармен де айналысып, жақсылық жасау арқылы үлкендердің алғыс-баталарын алып жүр.

-Біздің ұйымның қатарында 50-ден астам студент бар. Барлығы қоғамдық жұмыстарға өте белсенді араласа білетін жастар. Сондықтан, биылғы бірінші курсқа қабылданған студенттерді де өзіміздің қатарымызға қосылуға шақырамыз, - деді Аружан Ғалымжанқызы.

Іс-шара қатып қалған бір сценарий бойынша емес, еркін форматта өткендіктен студенттер үшін де көңілді әрі қызықты болды. Әрбір студенттік ұйым өздерінің ұстанған бағыттары мен мақсаттарына орай шығармашылық нөмірлер ұсынды.  Мысалы «Құс қанат ғұмыр» ұйымының жастары поэзия оқыса, «Жайдарманның» әзілкештері өз әзілдерін сахналап, жиналған жастардың көңілін көтерді. Сонымен қатар, бірінші курс студенттері үшін шағын фуршет жасап, тәтті тағамдардан дән ұсынды. Сондай-ақ, университеттің жас әншісі Мадияр Аширов «Әлия» әнін тарту етті.