ШЕТЕЛДІК ОҚЫТУШЫЛАР №3 ГИМНАЗИЯ ОҚУШЫЛАРЫМЕН КЕЗДЕСТІ

10.12.2022

Әлкей Марғұлан атындағы Павлодар педагогикалық университеті «Шет тілі: екі шет тілі» білім беру бағдарламасының жетекшісі Әлия Жолбаева шетел мұғалімдерімен бірлесіп Павлодар қаласындағы дарынды балаларға арналған №3 гимназияның 10-11 сынып оқушыларымен кәсіптік бағдар беру жұмыстарын жүргізді. Әлия Садуқызы жоғары сынып оқушыларын «Шет тілі: екі шет тілі» оқу бағдарламасымен таныстырып, негізгі тіл ретінде ағылшын тілін, ППУ-да екінші шет тілі ретінде неміс немесе қытай тілдерін оқып, үйрену мүмкіндіктеріне тоқталды. Сыртқы академиялық ұтқырлықтың бөлігі ретінде шетелде оқу және жалпы біздің университетте оқу туралы айтылды.

Түркиядан келген профессор, PhD докторы Кюршат Джесур балаларға ағылшын тіліндегі ойындар, карталар, трюктар мен сиқырлар арқылы оқытудың ерекше әдісі туралы айтып берді. Бұл автордың балаларға жастайынан ағылшын тілін үйрету әдісі болып саналады. Профессор балаларды өзінің YouTube арнасы, кітаптары мен оқу құралдарын жүктеп алуға болатын сайтпен таныстырды.

Жалпы, гимназия мұғалімдері де, оқушылары да шетелдік оқытушылармен кездесіп, «Шет тілі: екі шет тілі» білім беру бағдарламасымен толығырақ танысу мүмкіндігіне риза болып, ұйымдастырушыларға алғысын білдірді.