РЕКТОР УНИВЕРСИТЕТ БЕЛСЕНДІЛЕРІМЕН КЕЗДЕСТІ

28.09.2023

Бүгін Марғұлан университетінің ректоры Жанбол Жилбаев оқу орынның белсенді студенттерімен кездесіп, олардың атқарып жатқан жұмыстарымен танысты. Кездесу барысында университет белсенділері жаңа құрылған студенттік ұйымдардың мақсат-міндеттерімен және жаңа жобаларымен бөлісті.

-Университет алдына үлкен қосымша бөлме салынып жатыр.Бұл қазан айында пайдаға беріледі деп сеніп отырмыз.Жалпы мен сіздермен кездесіп, сұхбаттасуды ертеден жоспарлап едім. Бүгін соның сәті түсті. Кездесудің мақсаты – сіздермен еркін әңгімелесіп, болашақтағы жоспарларыңызбен бөлісу және қандай мәселелер бар дегенді тыңдау. Бүгін ғана жаңа құрылған Foundation факультетінің тыңдаушыларымен кездестік. Оларға сіздердің тараптарыңыздан да жан-жақты қолдау қажет, - деді Жанбол Октябрьұлы.

Жастар бастамаларын дамыту орталығының директоры Мәдина Шалқарқызының сөзінше, өткен оқу жылында 16 студенттік ұйым болса, биыл олардың саны 21-ге жеткен. Кездесу барысында студенттік парламенттің президенттері, министрлері және жаңа құрылған ұйымдардың жетекшілері өздерін таныстырып, алдағы жоспарларымен бөлісті. Сонымен қатар, департамент директоры “ШАМШЫРАҚ” көшбасшылар академиясының жобасымен таныстырды. Мұнда студенттің көшбасшылық әлеуетін ашу және дамыту, оны қоғамдық пайдалы қызметке қосу арқылы тиімді өзара әрекеттесу дағдыларын үйрету көзделген. Жаңа жоба бірнеше бағыттан тұрады. Яғни, толық адам концепциясын жүзеге асыру, кәсіби біліктілікті жетілдіру, қажетті мамандандырылған білім сынды бағыттары бар.