РЕКТОР УНИВЕРСИТЕТ АРДАГЕРІНЕ МЕРЕЙТОЙЛЫҚ МЕДАЛЬДЫ ТАПСЫРДЫ

31.12.2022

Әлкей Марғұлан атындағы Павлодар педагогикалық университетінің басқарма төрағасы-ректор Жанбол Жилбаев университет ардагері Нариман Машраповты жаңа жыл мерекесімен құттықтай барып, университеттің 60 жылдық мерейтойлық медалімен марапаттады.

– Құрметті Нариман Құдайбергенұлы, денсаулығыңызға байланысты университеттің мерейтойлық шараларына қатыса алмағаныңыз өкінішті. Сізді келе жатқан Жаңа жыл мерекесімен құттықтауға және университеттің даму жолындағы көп жылғы жанқиярлық еңбектеріңіз үшін алғыс білдіруге келдік. Сізді биыл атап өткен 85 жылдық мерейтойыңызбен шын жүректен құттықтаймын. Әрқашан ортамызда жүріп, жастарға терең біліммен, тәжірибеңізбен бөлісе беруіңізге тілектеспін. Деніңізге саулық, жанұяңызға амандық тілеймін! – деді Жанбол Октябрьұлы.

Нариман Құдайбергенұлы 1962 жылы Н.К.Крупская атындағы Семей мемлекеттік педагогикалық институтын «Математика және физика» мамандығы бойынша бітірген. Білім беру саласындағы еңбек жолын сол жылы Павлодар қаласындағы Абай атындағы №10 орта мектепте бастады.

Ал 1967 жылдан бастап, биылғы жылға дейін Павлодар педагогикалық университетінде еңбек етіп, алдына келген шәкірттеріне сапалы білім мен саналы тәрбие берді. Ол білім берумен ғана шектелмей, ғылымға ден қойып, физика-математика саласындағы күрделі тақырыптарды зерттеген ғалым.

1986 жылы «Дифференциалдық теңдеулер және математикалық физика» мамандығы бойынша кандидаттық диссертациясын қорғады. Бүгінде ұлағатты ұстаздың тәрбиелеген шәкірттері еліміздің әр түкпірінде табысты еңбек етіп, еліміздің өркендеуіне үлестерін қосуда.