ҚОС ДИПЛОМ: MU МАГИСТРАНТЫ ТҮРКИЯДА БІЛІМ АЛУДА

27.11.2025

2023 жылы Әлкей Марғұлан атындағы Павлодар педагогикалық университеті Түркияның Токат Газиосманпаша университетімен «Тарих» және «Шетел тілі» бағыттары бойынша магистратураға арналған қос диплом бағдарламасын жүзеге асыру туралы меморандумға қол қойды.

Қос дипломдық бағдарлама бойынша шетелде оқуға жолдама алғандардың бірі - «Тарих» білім беру бағдарламасының магистранты Кадир Дәуірбек. Ол қазір Түркия университетінде екінші жыл білім алып жатыр. Бағдарлама талаптарына сәйкес магистрант екі семестрді Марғұлан университетінде, екі семестрді - Токат Газиосманпаша университетінде оқиды.

«Мені қабылдаған Токат Газиосманпаша университеті еуропалық стандартқа сай білім береді. Барлығы ізденушінің өз еркінде, өз қалауында. Ең бастысы - берілген тапсырманы уақытылы және сапалы орындап, емтихандарды нәтижелі тапсыру қажет», – деп өз әсерімен бөлісті Қадір.

Қадір Дәуірбектің айтуынша, көптеген магистранттардың арасынан шетелде білім алу бақытының өзіне бұйырғанына қуанышты және осы мүмкіндіктің нәтижесін еліміздің жоғары білім беру саласына жұмсауға ат салысатынын атап өтті.