ҚЫСҚЫ CПОРТТЫҚ СПАРТАКИАДАНЫҢ АШЫЛУЫ ӨТТІ

20.01.2025

Бүгін Әлкей Марғұлан атындағы Павлодар педагогикалық университетінде профессор-оқытушылар құрамы мен қызметкерлер арасындағы дәстүрлі қысқы спорттық спартакиаданың ашылуы өтті. Шараға Марғұлан университеті басқарма төрағасы-ректор Ержан Әмірбекұлы қатысып, барлық қатысушы командаларға сәттілік тіледі.

-Мұндай шараларды ұйымдастырудағы мақсатымыз - ұжымның корпоративтік рухын күшейтіп, әріптестер арасындағы береке-бірлікті нығайту. Әрине спорттық жарыстар ұстаздар мен қызметкерлер арасында салауатты өмір салтын қалыптастыруға ықпал ететіні анық. Биыл біз дәстүрлі спартакиаданың форматын өзгертіп, жаңа бағытта өткізудеміз. Әрбір қатысушыға сәттілік тілей отырып, жарыстың жоғары деңгейде өтуіне атсалысуға шақырамын, - деді университет басшысы. Сонымен қатар, университет кәсіподақтар ұйымының төрағасы Роза Жаева сөз сөйлеп, дәстүрлі спартакиаданың ашылуымен құттықтады.
Бұл спартакиада университет оқытушылары мен қызметкерлері арасында қыс мезгілінде жыл сайын өтетін дәстүрлі жарыс. Бұрнағы жылдары әрбір жоғары мектеп пен құрылымдық бөлімшелер жеке-жеке команда құрып, бір-бірімен бәсекеге түсетін еді. Биыл барлығы аралас өнер көрсетеді. Биылғы жарысқа алты команда қатысуда. Олар - “Ертіс”, “Қыран, “Алау”, “Барыс”, “Жігер”, “Баянтау” командалары. Ал команда құрамы ойын алдында жеребе арқылы анықталады.