ҚАЗАҚСТАНДАҒЫ ПЕДАГОГИКАЛЫҚ УНИВЕРСИТЕТТЕР КОНСОРЦИУМЫ

05.12.2022

Әлкей Марғұлан атындағы Павлодар педагогикалық университетінің 60 жылдығын мерекелеу аясында педагог кадрларды даярлау саласындағы жоғары оқу орындарының Консорциумын құру туралы меморандумға қол қою рәсімі өтті.

Консорциумға педагогикалық бағыттағы бес жоғары оқу орны кіреді: Абай атындағы Қазақ Ұлттық педагогикалық университеті, Қазақ ұлттық қыздар педагогикалық университеті, Ы.Алтынсарин атындағы Арқалық педагогикалық институты, Оңтүстік Қазақстан мемлекеттік педагогикалық университеті және Әлкей Марғұлан атындағы Павлодар педагогикалық университеті.

Педагогикалық білім беру саласындағы университеттердің консорциумын құрудың мақсаты – педагогикалық білім мен ғылыми зерттеулері саласындағы ынтымақтастықты нығайту және дамыту.

Тараптар қызметкерлер мен ғылыми-педагогикалық кадрлардың біліктілігін арттыру, бакалаврларды, магистранттарды және докторанттарды даярлау бойынша бірлескен іс-шараларды жүзеге асыру арқылы мұғалімдердің білім беру және ғылыми-зерттеу қызметі саласында ынтымақтастық орнатуға ниетті.

Әріптес университеттер магистранттар мен докторанттар үшін ғылыми тағылымдамадан өтуді ұйымдастыру, бірлескен ғылыми жобаларды әзірлеу, бірлескен семинарлар мен ғылыми конференциялар мен тіл курстарын ұйымдастыру арқылы студенттер мен профессорлық-оқытушылық құрамның академиялық ұтқырлығын дамыту үшін бірлесіп жұмыс істейтін болады.

Сонымен қатар, семинарлар, іс-сапарлар, презентациялар, тренингтер және ақпарат алмасуды қамытатын университеттердің тәжірибесін таратуға бағытталған іс-шараларды өткізу жоспарлануда.

Педагогикалық білім беру саласында жоғары оқу орындарының консорциумын құру туралы меморандум біздің оқытушылар мен білім алушыларға академиялық, ғылыми-зерттеу және тәрбие қызметі бағыттары бойынша көптеген мүмкіндіктер береді.