ҚАЗАҚСТАН – ҚАЗАҚТЫҢ ОТАНЫ: Марғұлан университеті шетелдегі бауырларды қолдауға ерекше көңіл бөледі

08.10.2025

Бүгін Марғұлан университетінде ректор Ержан Әмірбекұлы Foundation бөлімінің тыңдаушыларымен кездесті.

Марғұлан университетіндегі Foundation бөлімі 2016 жылдан бері жұмыс істейді. Жаңа оқу жылында бөлімге 23 тыңдаушы қабылданды, олардың 20-сі Моңғолиядан, 3-і Қытайдан келген. Барлық студенттер университеттің жатақханасында тұрады.

Оқу 1 қазаннан 30 маусымға дейін жүргізіледі және ҰБТ-ға дайындықпен қатар Қазақстандағы өмір мен оқуына бейімделуді қамтиды. Негізгі пәндер: Қазақстан тарихы, қазақ және орыс тілдері, акмеология және дене шынықтыру. Таңдау бойынша студенттер биология, математика, физика, ағылшын тілі, география және дүниежүзі тарихын оқиды.

Бөлімнің түлектері жоғары нәтижелер көрсетіп отыр: соңғы екі жылда 33 студент Марғұлан университетіне, 13 студент басқа жоғары оқу орындарына оқуға түсті.

Бөлімнің артықшылықтары қатарында сыныптардағы шағын топтар арқылы сапалы оқытуды қамтамасыз ету, грант болмаса оқу ақысына 100% жеңілдік алу мүмкіндігі және жатақханада 50% жеңілдікпен тұру мүмкіндігі бар.

Ректор Ержан Әмірбекұлы студенттерге табандылық, еңбекқорлық пен оқудағы жетістіктер тілеп, сапалы білім алудың жеке және кәсіби мақсаттарға жетудегі маңыздылығын атап өтті. Сондай-ақ, ол Foundation бөлімі студенттердің университетке бейімделуі мен табысты бастамасы үшін барлық қажетті жағдайларды қамтамасыз ететініне сенім білдірді.