ПРОФЕССОР ХОЛГЕР КУССЕ ЖӘНЕ TU DREZDEN СТУДЕНТТЕРІНІҢ САПАРЫ

05.06.2023

Марғұлан университетіне профессор Холгер Куссе бастаған Дрезден университетінің (Германия) бір топ славянтанушы студенттері келді.

Германиядан келген қонақтарды университеттің академиялық мәселелр жөніндегі проректоры Ольга Андрющенко қарсы алып, бірлескен ынтымақтастықтары үшін алғысын білдірді. «Профессор Холгер Куссе мен Дрезден университетінің студенттерін қарсы алғанымызға өте қуаныштымыз! Бізді өте тығыз тарихи-мәдени байланыстар біріктіреді. Әріптестерімді «Даналық тілдері» монографиясының тұсаукесерімен құттықтаймын. Бұл баршамыз үшін айтулы оқиға, достығымыз бен ортақ ғылыми байланыстарымыздың символы. Баршаңызға жемісті еңбек және сәттілік тілеймін!», - деді Ольга Константиновна.

Біздің университеттің студенттері қазақтың ұлттық салт-дәстүрлері-ерулік, қонақасы, қонақ кәде, балаға ат қою, қырқынан шығару, тұсаукесу, сүндетке отырғызу, ауызға түкіру, келін түсіру, беташар жасау, баланы ашамайға мінгізу, бастаңғы секілді ұлттық рәсімдермен таныстырды.

Гуманитарлық ғылымдар жоғары мектебінің деканы Анар Кәрімова құттықтау сөзінде Германиядан келген құрметті қонақтарды қонақжай қазақ жерінде қарсы алғанына қуанышты екенін айтты. «Ата-анасы Қазақстанда өскен студенттерді көргеніме өте қуаныштымын. Біздің мәдениет сіздерге жақын және таныс деп ойлаймын. Мен профессор Холгер Куссеге ерекше алғысымды білдіргім келеді. Мемлекеттер арасында кейде орын алатын бюрократиялық кедергілерге қарамастан, сіз өз салаңыздың жанашыры, жоғары білікті маман ретінде білім мен мәдени көпірлерді орнатуға көп күш салып жатырсыз», - деді Анар Еркенқызы.

Профессор Холгер Куссе әріптестеріне қонақжайлығы үшін шын жүректен алғыс білдірді. Дрезден университетінің студенттері мен магистранттары Германиядағы білім беру жүйесі, еуропалық тілдер, университеттің білім беру бағдарламалары туралы мазмұнды баяндамалар жасады. Олар Германия, қаланың көрікті жерлері, неміс фольклоры мен салт-дәстүрлері туралы презентациялар жасады.

Филология ғылымдарының докторы, профессор Зифа Темірғазинаның айтуынша, Дрезден университетінің Славянтану институтының директоры, профессор Холгер Куссемен тығыз ынтымақтастық бірнеше жылдан бері жалғасып келеді. Бұл Эразмус+ бағдарламасы бойынша бірлескен іс-шаралар, ұжымдық монография жазу және т.б. Бұл жолы кездесу академиялық алмасу мақсатында ұйымдастырылды.

Сондай-ақ неміс студенттері Баянауыл ұлттық саябағын, Павлодар мұражайларын аралап, Ертіс жағасындағы қаланың басқа да көрікті жерлерімен танысты.