ПРОФЕССОР НАРИМАН МАШРАПОВ 85 ЖАСТА

28.08.2022

Павлодар педагогикалық университеті жаратылыстану ғылымдар жоғары мектебінің профессоры, физика-математика ғылымдарының кандидаты Нариман Машрапов биыл мерейлі 85 жасқа толып, ұзақ жылдық ұстаздық қызметін тоқтатты. Бүгін Павлодар педагогикалық университетінің ғылыми жұмыстар және халықаралық қатынастар жөніндегі проректоры Бауыржан Есенгелдин мен жаратылыстану ғылымдар жоғары мектебінің деканы Ермек Ғабдуллин ардагерді мерейтойымен құттықтап, университет ректоры Жанбол Жилбаевтың құттықтау хатын табыстады.

Нариман Құдайбергенұлы 1962 жылы Н.К.Крупская атындағы Семей мемлекеттік педагогикалық институтын «Математика және физика» мамандығы бойынша бітірген. Білім беру саласындағы еңбек жолын сол жылы Павлодар қаласындағы Абай атындағы №10 орта мектепте бастады. Ал 1967 жылдан бастап, биылғы жылға дейін Павлодар педагогикалық университетінде еңбек етіп, алдына келген шәкірттеріне сапалы білім мен саналы тәрбие берді. Ол білім берумен ғана шектелмей, ғылымға ден қойып, физика-математика саласындағы күрделі тақырыптарды зерттеген ғалым. 1986 жылы «Дифференциалдық теңдеулер және математикалық физика» мамандығы бойынша кандидаттық диссертациясын қорғады. Бүгінде ұлағатты ұстаздың тәрбиелеген шәкірттері еліміздің әр түкпірінде табысты еңбек етіп, еліміздің өркендеуіне үлестерін қосуда.

Құрметті Нариман Құдайбергенұлы, сізді мерейтойыңызбен шын жүректен құттықтай отырып, зор денсаулық тілейміз.