ХАЛЫҚАРАЛЫҚ ОЛИМПИАДА: ППУ КОМАНДАСЫ ІІІ ОРЫНДА

04.05.2022

Жақында Абай атындағы ҚазҰПУ мен Жаратылыстану және география институтының ұйымдастыруымен жаратылыстану пәндері бойынша II Халықаралық студенттік олимпиадасы өтті. Олимпиада Қапшағай қаласындағы «Балдәурен» Республикалық оқу-сауықтыру орталығында болды. Оған Ресей, Өзбекстан, Қырғызстан, Қазақстан университеттерінен 10 команда қатысты. Әр команда 3 студенттен құралған.

Олимпиада 4 кезеңнен тұрды. 1-ші кезең «Педагогика бізді біріктіреді» тақырыбында командалардың таныстыруы, 2-ші кезең педагогикаға қатысты тест тапсырмаларын орындау, 3-ші кезең білім беру әдістемесіне сай тақырыптар бойынша көлемі 500 сөзден кем болмайтын эссе жазу, 4-ші кезең «Климаттың өзгеруі және тұрақты даму» тақырыбында кейс қорғау. Аталған іс-шарада студенттер өздерінің білімін, белсенділіктерін көрсетті.
Олимпиада нәтижесі бойынша Павлодар педагогикалық университетінің командасы жүлделі III-орынға ие болды.

Бірінші орын Низами атындағы Ташкент мемлекеттік педагогикалық университетінің командасында. Екінші орынға Абай атындағы ҚазҰПУ және Мәскеу қалалық педагогикалық университетінің командалары иеленді.
Павлодар педагогикалық университеті командасының құрамында Сабохат Марғанбаева (ГТ-41), Нұрқасым Абраев (ХМ-31), Әдия Масалимовалар (БМ-21) болды. Команда жетекшісі - Жаратылыстану жоғары мектебінің ғылым жөніндегі вице-деканы Нүкенов Айбар Сапарұлы.

Сонымен қатар, Павлодар педагогикалық университетінің студенті Нұрқасым Абраев «Ең мықты химик» номинациясына ие болды.