ППУ СПОРТШЫЛАРЫ ҚАЗАҚ КҮРЕСІ ТУРНИРІНЕ ҚАТЫСТЫ

11.05.2023

Ә.Марғұлан атындағы Павлодар Педагогикалық университетінің студенттері Төлеутай Қанаевты еске алуға арналған республикалық қазақ күресі турниріне қатысып, жүлделі орындарға ие болды. Атап айтсақ, өнер және спорт жоғары мектебінің студенттері Алдияр Айтмұхан, Әсел Манап, Мөлдір Әдепбай жеңімпаздар тұғырынан көрінді. Сонымен қатар, Қизатбек Абдығалым, Аяулым Рымбай жүлделі екінші орынға ие болды. Ал Аяна Салаубек есімді спортшы үшінші орынды еншіледі. Ұйымдастырушылардың сөзінше, жарысқа Атырау, Абай, Қостанай, Петропавл, Ақтөбе және Павлодар облыстары мен Астана қаласынан 130-ға жуық спортшы келген.

Аталған жүлдегер студенттерді жарысқа дайындаған - өнер және спорт жоғары мектебінің жаттықтырушылары Қайрат Темірханов пен Жанар Усина.

Аталған спортшылар алдағы уақытта Кемер Әшімбетовті еске алуға арналған республикалық турнирде белдесетін болады. Марғұлан университетінің ғана емес, Павлодар облысының намысын абыроймен қорғап жүрген палуандарға сәттілік тілейміз.