ППУ ОҚЫТУШЫЛАРЫ ТҮРКІСТАНДА 70-ТЕН АСТАМ МЕКТЕПТІҢ ОҚУШЫЛАРЫМЕН КЕЗДЕСТІ

13.04.2023

Ә.Марғұлан атындағы Павлодар педагогикалық университетінің оқытушылары оңтүстік аймақтарды аралап, биыл мектеп бітіретін түлектер үшін кәсіби бағдар беру жұмыстарын жүргізуде. Өнер және спорт жоғары мектебінің оқытушысы Сәуле Иксатова мен жаратылыстану жоғары мектебінің оқытушысы Әділбек Елемесов қазіргі таңда Түркістан облысын аралап жүр.

Оңтүстіктің оқушыларына арналған кәсіби бағдар беру жұмысы сәуір айының 10-да басталып, 14-не дейін жалғаспақ. Осы бір апта уақыт ішінде 74 мектепті қамту жоспарланған.

- Биыл Түркістан облысы кәсіби бағдар жұмыстарын жоғары деңгейде ұйымдастыруда. Яғни, облыстық жастар бастамаларын дамыту орталығы арнайы кесте құрып, сол кесте бойынша кездесулер өткізіп жатырмыз. Бұл жақта бала көп, мектептер жиі орналасқан. Бір ауылдың өзінде үш-төрт мектеп орналасқан. Оқушылар да өте жақсы қабылдап жатыр. Біз Марғұлан университетінің өзге оқу орындарынан ерекшелігін, студенттерге жасалған жағдай мен сапалы білім алу мүмкіндіктері туралы айтамыз. Жалпы, жоспар бойынша осы бір аптаның ішінде 74 мектепті қамтуды жоспарлап отырмыз,- деді Сәуле Иксатова.

Қазіргі уақытта Түркістан облысында Астана, Семей, Қарағанды, Өскемен, Қостанай, Петропавл, Жезқазған және Павлодар қалаларынан 15 жоғары оқу орынның өкілдері кәсіби бағдар беру жұмысын жүргізуде.