ППУ-ДА Ә.МАРҒҰЛАННЫҢ ҒЫЛЫМИ МҰРАСЫ ТУРАЛЫ КОНФЕРЕНЦИЯ БАСТАЛДЫ

12.05.2023

Бүгін Ә.Марғұлан атындағы Павлодар педагогикалық университетінде «Академик Ә.Х. Марғұланның ғылыми мұрасы және Қазақстандағы тарих ғылымының өзекті мәселелері» атты  халықаралық ғылыми-практикалық конференциясы басталды. Мақсаты – қазақстандық және шетелдік ғалымдардың Ә.Х.Марғұланның ғылыми мұрасын зерттеуін күшейту, ғылым, білім және қоғам интеграциясын дамыту. Сонымен қатар, Әлкей Марғұланныың еңбегін шетелге таныту. Конференияның шымылдығы Марғұлан университетінің ректоры Жанбол Жилбаевтың Алғы сөзімен ашылып, ұйымдастырушылар мен қатысушыларға сәттілік тіледі.

- Бүгін білім ордасында көрнекті жерлесіміз, археолог, тарихшы, Қазақстан Ғылым Академиясының академигі Әлкей Марғұланның туған күніне орай халықаралық ғылыми конференция өтіп жатыр. Бұл өңіріміздің ғылыми қауымдастығы үшін ғана емес, еліміздің тарихы, археологиясы, мәдениетіне бей-жай қарамайтын көпшілік қауым үшін маңызы зор. Академик қазақ халқының тарихын, материалдық және рухани мәдениетін ғыылми тұрғыда өте терең зерттеген ғұлама ғалым. Оның асыл мұралары жас ғалымдар үшін баға жетпес дерек көзі болса ,музей мамандары үшінқұнды жәдігерлер қатарында. Конференцияға қатысқан барлық ғалымдарға алғыс білдіре отырып, сәттілік тілеймін, - деді университет басшысы.

Ауқымды ғылыми шараға  Баласағұн атындағы Қырғыз ұлттық университетінің профессоры Шайыркүл Батырбаева арнайы келіп қатысты. Филология ғылымдарының докторы, профессор Сүтжанов Сейфитден, филология ғылымдарының докторы, профессор Темиргазина Зифа, Торайғыров университетінің профессоры, тарих ғылымдарының докторы Жүсіпова Лаура, Торайғыров университетінің профессоры, философия ғылымдарының кандидаты Құдабаев Амантай, Margulan Centre орталығының ғылыми қызметкері Еңлік Әбеуова және басқа да ғалымдар баяндама жасады. Сонымен қатар, академиктің ұрпағы Данель Марғұлан онлайн режимде қосылып,  университет басшылығына алғысын білдірді. Одан бөлек Низами атындағы Ташкент (Өзбекстан)  мемлекеттік педагогикалық университетінің академигі, тарих ғылымдарының докторы Ахмадали Асқаров, тарих ғылымдарының докторы, профессор, Шығыс елдерінің Халықаралық архитектура академиясының корреспондент-мүшесі Серік Әжіғали онлайн режимде қосылып, Әлкей Марғұлан еңбектеріне қатысты зерттеулерін баяндады.