ППУ СТУДЕНТТЕРІ ДӘСТҮРЛІ ОҚУҒА ҚАЙТА ОРАЛДЫ

01.02.2021

Павлодар педагогикалық университетінің студенттері қалыпты оқу форматына көшті. Жылға жуық карантиндік уақыт үзілісінен кейін университет қабырғасы қайта студенттерімен толықты. Күз айында оқуға қабылданған 1 курс студенттері енді екінші семестрден бастап нағыз студенттік өмірдің қызығын татпақ.  

Түркістан облысынан келген Мадина Жақсылық оқуға қабылданған күннен бастап университетті көруге асыққандығын айтады:

-        Бірінші күн өте қызықты өтіп жатыр, онлайн оқығаннан гөрі бір-бірімізді көріп, осылай дәріске қатысқан анағұрлым қызық. Топтастарымызбен енді танысып, білісіп, бәріміз қуанып жатырмыз.

Ғұмар Қайратов:

-        Өзім Алматыданмын. Бірінші күні осында келгенде жақсы қарсы алды. Бүгін оффлайн режимде бірінші сабағымыз өтті. Қашықтан оқумен салыстырғанда жақсы, себебі мұғалімдерді бетпе-бет көреміз, сабақ процесі де  түсінікті өтеді. Студенттік өмір аздап болса да, сезіле бастады.

Маржан Қалдыбаева:

-        Маған университетіміздің іші, оқу аудиториялары, дәліздері, жалпы барлығы қатты ұнап жатыр. Бірінші күннен бастап жақсы әсер алдық. Оқытушыларымыз да керемет! Бірақ ең бастысы – өзімнің топтастарыммен кездесуім қызық болды, өйткені оқу басталғалы олармен бірде-бір рет жолықпадық, тек көгілдір экранның ар жағынан, әлеуметтік желілерде ғана сөйлесетінбіз, ал енді бір-бірімізді шынайы көріп қуанып жатырмыз, - дейді. 

Жаңа университет есігін ашып, оқуға қабылданған жастар Павлодар педагогикалық университетін арнайы таңдап түскендерін айтады.

Елжан Омарханов: 

-        Семей қаласынан келдім. Павлодар ұнап жатыр. Адамдары да қарапайым, мейірімді көрінді. Келген бетте жатақханаға орналастым. Жағдайы жақсы, жылы, бөлмелері пәтер сияқты. Өзім мұғалім мамандығын таңдағандықтан осы жерге түсуді көздедім. Павлодарда жоғары оқу орындарында коррупция да аз деп естідім. Республикалық педагогикалық білім беретін жоғары оқу орындары ішінде рейтінгісі жоғары, сондықтан ППУ-ды таңдадым. 

Ғұмар Қайратов:

-        Көптеген жоғары оқу орындары арасынан Павлодар педагогикалық университетін таңдадым, себебі мамандығым бойынша рейтінгіде жоғары орында тұр. Павлодар да өзіме жайлы, климаты ұнайды. Түскен мамандығыма өте ризамын. Университеттің мұғалімдері де қабілетті, болашақта осы оқу ордасында көптеген жетістіктерге жетемін деп ойлаймын.

Жанель Бауыржанова:

-        Ата-анамнан алысқа кеткім келмеді. Мектеп кезінде пән олимпиадаларына қатысып жүрген кезімде Қуаныш Советұлы қазылар алқасында жиі отыратын. Сол кісінің білімі мен тәжірибесіне қарап, университет ұстаздары да жақсы екенін топшыладым. Әрі осы университетті менің туған әпкем де бітірді, ол да өзі оқитын оқу орнын үнемі мақтайтын.

Мадина Жақсылық:

-        ППУ білім рейтінгісі бойынша Қазақстан университеттері арасында алдыңғы қатарда. Және де маған Павлодар қаласының мәдениеті мен өркениеті қатты ұнайды.

Бүгінде Павлодар педагогикалық университетіне күндізгі оқу формасына 565 бірінші курс студенттері қабылданған. 1 курс студенттеріне арналған оқу процесі Павлодар педагогикалық университетінде аралас форматта ұйымдастырылады. Яғни, дәрістер – онлайн форматта өтсе, семинарлар мен практикалық сабақтар дәстүрлі қалыпты форматта өтеді. Сабақтар 40 минуттан екі ауысымда жүргізіледі, әр сабақ арасындағы үзіліс – 20 минут. Жоғары оқу орнының қалған студенттері ҚР БҒМ қойған талаптарыныа сәйкес, «Дене шынықтыру және спорт» білім беру бағдарламасын есепке алмағанда, қашықтан оқуды жалғастырмақ. Бітіруші курс студенттерінің кәсіби және диплом алдындағы практикалары онлайн форматта өткізіледі. Магистранттар мен докторанттардың ғылыми-тәжірибелік жұмысы мен теориялық білім алуы және қорытынды аттестаттаудан өткізілуі де қашықтан оқыту форматында жүзеге асырылады.

                                                                                                                                                   ППУ Баспасөз қызметі