ППУ СТУДЕНТІ ЖҰМЕКЕН ОҚУЫНА ҚАТЫСТЫ

11.10.2022

Павлодар педагогикалық университнтінің қазақ тілі мен әдебиеті мамандығының 1 курс студенті Дидар Сләмхан республикалық Жұмекен Нәжімеденов оқуларына белсенді қатысып, алғыс хат және ақшалай сыйлықпен марапатталды.

Әнұран авторы, мемлекеттік сыйлықтың лауреаты, қазақтың көрнекті ақыны Жұмекен Нәжімеденов атындағы «Елім менің!» көркемсөз оқу шеберлерінің республикалық байқауы Атырау облысында өтті.

Жастар саясаты департаментінің Студенттік филармониясы “Шешендік” өнер үйірмесінің жетекшісі Оразбек Бақытханның айтуынша, Дидар Сләмхан гуманитарлық ғылымдар жоғары мектебінің «Қазақ тілі мен әдебиеті» білім беру бағдарламасының бірінші курс студенті. Өнерлі қыз Көркем сөз үйірмесіне былтырдан бері қатысып жүр. Павлодарда өткен бірнеше көркем сөз оқуларының жеңімпазы атанып, осы жолы республикалық байқауда Кереку өңірі атынан сынға түсті.

«Байқау ережесі бойынша Жұмекен Нәжміденовтің бір өлеңін, бір прозалық туындысын мәнерлеп оқу керек болды. Студент автордың «Бір үзім нан» прозалық шығармасынан үзінді және «Менің үйім» деген өлеңін оқып, көрермендердің ыстық ықыласына бөленді», - дейді Оразбек Бақытхан.

Жастар саясаты департаментіне қарасты Студенттік филармониясының “Шешендік” өнер үйірмесін халықаралық, республикалық жыр-терме көркем сөз байқауларының жеңімпазы, университетіміздің түлегі Оразбек Бахатхан жүргізеді. Үйірме жұмысының мақсаты – бірінші курс cтуденттерінің оқудан тыс уақытында көркемсөз оқуға баулу.