«PPU MEDIA» ЖАС ТІЛШІЛЕР КЛУБЫ АШЫЛДЫ

13.10.2022

Павлодар педагогикалық университетінде білім алушы жастар арасында болашағын журналистикамен байланыстыратындар көп. Сондықтан, гуманитарлық ғылымдар жоғары мектебі мен баспасөз қызметі бірлесіп «PPU MEDIA» жас тілшілер клубы ашуды жөн санады. Оның құрамында шығармашылыққа құштар, сөз өнеріне жақын, яғни, болашақта журанистика саласында қызмет етуді армандайтын студенттер бар. Бүгін аталған жас тілшілер клубының ашылу салтанаты болды.

- Гуманитарлық ғылымдар жоғары мектебінде болашақта журналист болғысы келетін студенттер көп. Сондықтан, сондай жастарға бағыт-бағдар көрсетіп, қосымша білім беру мақсатында осындай ұйым ашуды жөн санадық. Алдағы уақытта өңірімізге белгілі баспа және тележурналистерін кездесуге шақырып, осы саланың кәсіби мамандарының дәрісін ұйымдастыру жоспарымызда бар, - деді гуманитарлық ғылмдар жоғары мектебінің вице-деканы Данияр Кенжалов.

Шараға облыстық «Найзатас» журналының бас редакторы Асыл Әбішев қатысып, болашағын бұқаралық ақпарат саласымен байланыстырғысы келетін жас тілшілерге ақыл-кеңесін берді.

- Қазір әлеуметтік желі мен интернет журналистикасының дамуымен дәстүрлі бұқаралық ақпарат құралдары кейінге ысырылып келеді. Бірақ, газет-журнал оқылмайды екен деп мерзімінен бұрын «өлтіруге» болмайды. Мүмкіндігінше дәстүрлі БАҚ-ты сақтап қалудың жолын ойластыруымыз керек. Ол үшін журналистика саласына өздеріңіздей жалынды жастар көптеп келіп, кәсіби журналистиканың сапасын көтеру қажет. Сондықтан, осындай жас тілшілердің ұйымын құрып, оның құрамына сөздің қадірін түсінетін жастарды тарту өте құптарлық бастама. Істеріңізге сәттілік тілеймін, - деді Асыл Әлімжанұлы.

Кездесу еркін тақырыптағы диалог форматында өтті. Студенттер де қонақтарға өздерін толғандырған сауалдарын жолдап, тұшымды жауап алды.