«PPU MEDIA» - БОЛАШАҚ ЖУРНАЛИСТАР ОРТАСЫ!

31.01.2023

Әлкей Марғұлан атындағы Павлодар педагогикалық университетінде білім алған студенттер білім саласында ғана емес, әртүрлі қоғамға маңызды қызметтер арқылы танымалдыққа ие болып жүр. Бүгінгі студенттер арасында болашақтарын БАҚ саласымен байланыстырып, білікті журналист болуды армандайтындар бар. Өткен оқу жылының басында «PPU Media» жас тілшілер ұйымы құрылып, журналист болуды армандайтын студенттердің басын қосқан. Оған университетің баспасөз орталығы атсалысып, өңіріміздегі танымал журналистермен кездесіп, тәжірибе алмасуына мүмкіндік жасады. Ұйымның тұсаукесер шарасына облыстық «Найзатас» журналының бас редакторы, ақын, журналист Асыл Әбіш келіп, заманауи медиа тақырыбында лекция оқыды. Одан кейін құрамында бірнеше БАҚ ұжымы қарайтын «Ertis Media» холдингіне экскурсия жасап, ондағы облыстық «Сарыарқа самалы», «Найзатас» журналы және «Павлодарньюс» ақпараттық агенттігінің редакциясында болып, журналистермен келелі кездесу өтті. Сонымен қатар, "Ertis Media" холдингының ұйымдастыруымен өткен "Табыс формуласы" атты журфиксқа қатысты.

«PPU Media» жас тілшілір ұйымының жетекшісі Айзада Сағидолланың айтуынша, ұйым құрамында 16 студент бар. Олар әртүрлі мамандық бойынша білім алатын студенттер.

-Біздің мақсатымыз – журналистка саласының қыр-сырымен танысу. Сондықтан, әртүрлі бағытта жұмыс жүргізуді жоспарлап қойдық. Мысалы университет ішінде болатын шараларға қатысып, бейнематериалдар жасау, танымал оқытушылардан, студенттерден сұхбат алу, сұхбат түсіру, облыстық газеттерге материалдар жолдау, ұйым мүшелері үшін журналистермен кездесулер ұйымдастыру жұмыстарын жүргізудеміз. Одан бөлек, газет, журнал редакцияларына, теле-радио студияларға экскурсия жасау жоспарымызда бар, - дейді Айзада.