ПІКІРТАЛАС ШЫҢЫНДА

18.02.2021

Халқымыз қашан да сөз құдіретін жоғары бағалап, сөзге тоқтаған.  Бір ауыз сөзбен адамның көңілін көтеріп, не місесін қайтаруға болады. Сөз – саясат, сөз – қару, сөз – құдірет. Алайда бүгінде  қаншалықты осы сөздің түп төркініне жете сөйлеп жүргеніміз бәрімізге аян. Дегенмен, қазіргі жасөспірімдер арасында  орынды жерде ұтымды сөз айта алатын жастарымыз да жоқ емес.

Есенқұл Ақәділ – Гуманитарлық ғылымдар жоғары мектебінің ИШ-42 тобында 4 курста оқиды. Университеттің «Aqiqat» қазақ дебат клубының президенті. 2017 жылдан бері клуб мүшелігінде. 1 курстан бастап клубішілік,  қалалық,  облыстық және республикалық пікірталас ойындарына қатысып, көптеген дебат турнирлерінің: қалалық Торайғыров университетінің ректор кубогі, облыстық «Ertis cup», республикалық  «Зиялы Қазақ» жастар кубогінің иегері, халықаралық "KMU cup" турнирінің командалық жеңімпазы атанған.

Жуырда Ақәділ 13-14 ақпан аралығында «ВИАК Ертіс» дебат клубы ұйымдастырған "Viak Cup I" республикалық онлайн пікірсайыс турниріне қатысып,  "Үздік төреші" номинациясын жеңіп алды. Турнирге Қазақстанның 9 аймағынан 15 университет қатысып,  100-ге жуық пікірсайысшылар үздік командаларды анықтады. Осы сияқты ірілі-ұсақты пікірталас алаңының турнирлерінде Ақәділ жиі бақталасып жүреді. Ұлттық дебат ойындарының сапасын арттыру, республикалық турнирлерде биік нәтиже көрсету үшін 2019 жылы қараша айында Павлодар Пікірсайысшылар Қауымдастығы құрылған болатын. Бүгінде Қауымдастық өңіріміздің 100-ге тарта пікірсайысшылар құрамын біріктіреді. Клуб мүшелігімен бірге Ақәділ дебаттан қалалық және облыстық мектеп оқушылары лигасын дайындауға көмек көрсетуде. 30 шақты пікірсайысшылары бар ППУ-дың «Aqiqat» клубы осы ұйымның ең ауқымды мүшесі. Қаңтар айынан бастап Ақәділ Есенқұл осы Қауымдастықтың координаторы болып сайланды. Алдағы уақытта университеттің «Aqiqat» пікірсайысшылар клубынан республикалық ойындарда биік нәтиже күтеміз!      

                                                                                                                                                                ППУ Баспасөз қызметі