ПАВЛОДАРҒА SATBAYEV UNIVERSITY-НІҢ ҒАЛЫМДАРЫ ЖҰМЫС САПАРЫМЕН КЕЛДІ

18.06.2022

Павлодар облысына Алматы қаласындағы Satbayev University-нің ғалымдары арнайы жұмыс сапарымен келді . Алатаудан Ертісті бетке алған қонақтар алдымен Павлодар педагогикалық университетіне ат басын бұрып, Марғұлан орталығының жұмысымен танысты. Делегацияны Павлодар педагогикалық университетінің Басқарма төрағасы-Ректор Жанбол Жилбаев қарсы алып, ЖОО-ның білім және ғылым саласындағы басым бағыттарды баяндады. Сондай-ақ, Марғұлан орталығының директоры Тимур Смағұлов аталған орталықтың археологиялық ғылыми зерттеу бағытындағы жұмыстарымен таныстырды. Ғалымдар студенттік GIS-зертханасының және халықаралық "YMAI"зертханасының құрылымын ерекше қызығушылықпен тамашалап, Сұлтанбет Сұлтанның үй-жайын аралап көрді.

Орталық басшысы экскурсия барысында Margulan Centre-дің құрылу тарихы туралы айтып берді. Сондай-ақ, XVIII ғасырдың көрнекті саяси қайраткері, халық арасында Сұлтанбет сұлтан ретінде танымал Сұлтанмұхамед Бахадурдың Қазақ елі мен Қазақ хандығы тарихындағы рөлі туралы мол мағлұмат берді.

Satbayev University-нің ғалымдарын аталған оқу орынның ректоры Мейрам Бегентаев бастап келді.

-Satbayev University-нің ғалымдары Қаныш Сәтбаевтың еліне алғаш келіп отыр.Мақсатымыз – Ертіс-Баян өңірінің ғалымдарымен тәжірибе алмасу. Сапар барысында Мәшһүр Жүсіптің, Сұлтанмахмұт Торайғыровтың, Қаныш Сәтбаевтың туған жерін тамашалап, кесенелеріне тағзым ету. Делегация құрамында химия, биология, нефтигаз, машинажасау, металлургия саласының ғалымдары бар. Алдағы уақытта осы Марғұлан орталығының ғалымдарымен іскерлік қарым-қатынастарымызды күшейтіп, бірлескен зерттеу жұмыстарын жүргізетін боламыз, дейді - Мейрам Бегентаев.

Сәтбаев университеті ақпараттық технологиялар институтының директоры, техника ғылымдарының докторы, профессор Раиса Дүкенбаева археологтардың компьютерлік томографияны қолдануын жоғары бағалады.

-Мен ақпараттық технологиялар институтын ұсынамын, қазір ғылыми тұрғыдан көптеген бағыттарды аштым. Олардың бірі - әлі жоқ томография нәтижелерін анықтайтын арнайы бағдарламалық жасақтамасы бар компьютерлік томография. Негізі археологиялық бағытта мұндай әзірлемелер әлі жоқ. Бұл-олардың жаңалықтарының бірі, сондықтан ол бізді қатты қызықтырды. Біз осы бағытта ынтымақтасуға дайынбыз,- деді ол.

Кездесу аясында тараптар Павлодар облысының ғалымдары Сәтбаев университетінің зерттеу зертханаларына түрлі сараптамалар жібереді деген ортақ келісімге келді. Сонымен қатар, ғылыми жобалар мен практикалық зерттеулер бойынша ынтымақтастық туралы келіссөздер жүргізді.