Павлодар педагогикалық университеті Ұлыстың Ұлы күні - Әз Наурыз мейрамын қарсы алуда

19.03.2021

Павлодар педагогикалық университеті Наурыз мейрамын қарсы алуға әзір. Жаңа аптаның басынан қазақша көйлек, қамзол, шапан киген университет қызметкерлері мерекені қарсы алуға қызу дайындықтарын жүргізіп кетті.

Қазақстан Республикасының Президенті Қасым-Жомарт Тоқаев «Тәуелсіздік бәрінен қымбат» мақаласында Наурыз мейрамын тойлау тұжырымдамасын жасап, Ұлыстың Ұлы күнін мерекелеу маңыздылығын атап өткен болатын. Бекітілген тұжырымдамаға сәйкес, апта аясында ППУ-дың М.Канапиянов атындағы колледжі мен жоғары мектептерінде  Наурыз мейрамына байланысты тақырыптық іс-шаралар өткізілді: «Менің шежірем», «Теңге көрмесі», «Бауырсақ party» байқауы, «Наурыз көже» конкурсы, және т.б. Өнер және спорт жоғары мектебінде Наурыз мерекесіне арналған спорттық шаралар өткізілді.

Е.Бекмаханов атындағы ғылыми кітапхана ұжымы университет қызметкерлері мен студенттеріне бауырсақ пен тәттілер таратып, дәмнен ауыз тигізді. Ал университет фойесінде Жастар саясаты департаментінің ұйымдастыруымен мерекелік концерт өтті. ППУ студенттік филармониясының ұжымы университет оқытушыларын, студенттерін және қызметкерлерін Наурыз мейрамымен құттықтады.

Наурыз мерекесі баршаларыңызға құтты болсын, құрметті әріптестер! Ақ дастархандарыңызға молшылық, дендеріңізге саулық және шаңырақтарыңызға бақыт тілейміз!

ППУ Баспасөз қызметі