MARGULAN UNIVERSITY-НЕ ЖАҢА ПРОРЕКТОР ТАҒАЙЫНДАЛДЫ

09.01.2023

Әлкей Марғұлан атындағы Павлодар педагогикалық университетінің стратегиялық даму және интернационалдандыру жөніндегі проректоры тағайындалды. Бұл қызметті енді Бауыржан Абуов атқаратын болады. Жаңа проректорды университеттің басқарма төрағасы-ректор Жанбол Жилбаев таныстырып, жаңа қызметте сәттілік тіледі.

Бауыржан Әбуов 2011 жылы Павлодар мемлекеттік педагогикалық институтын «Шет тілдері» мамандығы бойынша, ал 2016 жылы Висконсин-Мэдисон университетін «Білім берудегі көшбасшылық және заңнамалық талдау» магистрі дәрежесімен тәмамдаған. «Болашақ» бағдарламасының стипендиаты. Мамандығы: «Мектеп менеджменті және халықаралық жоғары білім».

Бауыржан Әбуов еңбек жолын 2011 жылы Павлодар қаласындағы Дарынды балаларға арналған Абай атындағы №10 гимназияда ағылшын тілі мұғалімі, сынып жетекшісі болып бастады. 2017 жылы Астана қаласы «Назарбаев Зияткерлік мектептері» білім беру бағдарламалары орталығының оқу-әдістемелік кешендерін қолдау және дамыту бөлімінің аға менеджері болып жұмыс істеді.

2018 жылы - «Назарбаев Университеті» ДББҰ Білім беру көшбасшылығы орталығының оқу және арнайы бағдарламалар бөлімінің басшысы. 2019-2020 жылдары Астана халықаралық университетінің жобаларды жүзеге асыру бөлімін басқарды. 2020 жылдан бастап қазіргі уақытқа дейін Астана қаласындағы «BTS Education» білім беру өнімдерін дамыту компаниясында ғылыми директор болып жұмыс істеді.

Павлодар педагогикалық университетінің стратегиялық даму және интернационалдандыру жөніндегі проректоры қызметіне енді кіріскен Бауыржан Болатұлы жауапты бөлім басшыларымен танысып, алдағы уақытта бірлесіп нәтижелі жұмыс жүргізетін боламыз деген сенім білдірді.