РЕСПУБЛИКАЛЫҚ ФИЗИКА ОЛИМПИАДАСЫНЫҢ ЖЕҢІМПАЗДАРЫ АНЫҚТАЛДЫ

21.04.2022

Павлодар педагогикалық университетінің 60 жылдық мерейтойының құрметіне ұйымдастырылған XIV республикалық студенттер олимпиадасы өз мәресіне жетіп, жеңімпаздар анықталды. Жүзден жүйрік атанған үздіктерді марапаттау рәсіміне ППУ тәрбие және әлеуметтік мәселелер жөніндегі проректоры Болат Құдайбергенұлы қатысып, топжарғандарды құттықтады.

- Ертіс-Баян жеріне қош келдіңіздер. Биыл Павлодар педагогикалық университеті 60 жылдық мерейтойын қарсы алды. Осы мерейтойы қарсаңында ұйымдастырылған білім сайысына алыстан ат терлетіп келгендеріңіздің өзі біз үшін үлкен мәртебе әрі құрмет. Физика саласы кез-келген адам таңдай бермейтін өте күрделі мамандық. Сондықтан, мұндай республикалық деңгейдегі олимпиадаға іріктеліп келудің өзі жетістік, - деді Болат Құдайбаргенұлы.

Олимпиада қорытындысына келсек, командалық есепте Алматы облысындағы Сүлеймен Демирель университеті жеңімпаз атанды. Екінші орынға Астана халықаралық университеті мен Х.Досмұхамедов атындағы Атырау университеті жайғасты. Ал М.Өтемісов атындағы Батыс Қазақстан университеті, І.Жансүгіров атындағы Жетісу университеті, Қ.Жұбанов атындағы Ақтөбе өңірлік университеті үшінші дәрежелі дипломмен марапатталды. Ал жеке қатысушылардың қорытындысы бойынша Е.Букетов атындағы Қарағанды университетінің студенті Әділсамат Абитаев жеңімпаз атанып, олимпиаданың басты символы - арнайы кубокты алып кетті.

- Олимпиадаға Сүлеймен Демирель университеті педагогика факультетінде физика мұғалімі мамандығы бойынша білім алатын студенттер келді. Біз республикалық олимпиадаға бірінші рет қатысып отырмыз. Соған қарамастан студенттер өз білімдерін жоғары деңгейде көрсетіп, командалық есепте жеңіске жеттік. Бұл біздің университеттің ежелден бері қалыптасқан білім сапасының жоғары екенін көрсетеді, - дейді С.Демирель университетінің оқытушысы Самат Мақсұтов.
Жеңімпаздар мен жүлдегерлер ақшалай және бағалы сыйлықтармен марапатталды.