ОБЛЫСТЫҚ КІТАПХАНАДА МАРҒҰЛАН УНИВЕРСИТЕТІ СТУДЕНТТЕРІНІҢ КӨРМЕСІ АШЫЛДЫ

13.03.2024

Биыл Марғұлан университетінің «Көркем еңбек» білім беру бағдарламасының құрылғанына – 20 жыл. Осыған орай С.Торайғыров атындағы облыстық кітапхананың “Айна” галереясында «Көркем еңбек» білім беру бағдарламасы студенттерінің “Жастармен көктем гүлдейді” атты көрмесі ашылды. Көрмеге талантты студенттердің 30-дан астам сурет және сәндік қолданбалы өнер туындылары қойылды.
Ашылу салтанатында «Көркем еңбек» білім беру бағдарламасының негізін қалаушы, педагогика ғылымының докторы, профессор Мансия Алинова мен Айман Жұматаева қатысып, студенттердің жұмысына жоғары бағаларын берді.
- Көрмеден бейнелеу және сәндік-қолданбалы өнер туындыларының алуан түрлілігін көруге болады. Соның ішінде картиналар, тоқыма бұйымдары, панно және көркем шығармашылық жұмыстары бар. Көрменің алғашқы күнінде ИнЕУ колледжі студенттері мен көркемсурет колледжінің студенттері тамашалады. Біздің студенттердің жұмысымен танысамын деген адамдарға есігіміз ашық, кез-келген уақытта келіп көрмені тамашалауға болады, - деді «Көркем еңбек» білім беру бағдарламасының оқытушысы Индира Ғадылбекова.