ДҮНИЕЖҮЗІЛІК КІТАП КҮНІНЕ АРНАЛҒАН КІТАП АПТАЛЫҒЫ

24.04.2022

Е.Бекмаханов атындағы ғылыми кітапхана Дүниежүзілік кітап және авторлық құқық күніне арналған кітап апталығын өткізді. Осы апталық аясында "Book Slam: Мен оқыдым және сіздерге кеңес беремін" атты кітап сайысы өтті. Оған Гуманитарлық ғылымдар жоғары мектебі мен М. Қанапьянов атындағы жоғары колледж студенттері қатысты.

Кітап апталығы аясында көрнекті ағартушы және саяси қайраткер Ахмет Байтұрсыновтың 150 жылдығына арналған "А.Байтұрсынұлы-тіл туының тұғыры" атты әдеби кеш өтті. Оқырмандар үшін Ұлт мұғаліміне арналған "Қазақ халқының көшбасшысы" атты кітап көрмесі ұйымдастырылды.

Сонымен қатар, «Жаңа қоғамдағы жастардың әлеуеті: білім мен ғылымның сапасы» атты XVII студенттік халықаралық ғылыми-практикалық конференцияға қатысушылар үшін «білімді ұрпақ – елдің болашағы» атты кітап көрмесі ұйымдастырылды. Ал ғылыми кітапхана оқырмандары арасында "Кітап білім көзі"атты әңгіме өткізілді.

Енді Е.Бекмаханов атындағы кітапханаға тоқталар болсақ, кітапхана қорында педагогика, психология, өнер, жаратылыстану және басқа да ғылымдар бойынша еңбектер сақталған.  Кітапхана қоры шамамен 500 мың дананы құрайды. Кітапхана университеттің құрылымдық бөлімшесі болып табылады және оқытушылар мен студенттердің оқу - тәрбие үрдісі мен ғылыми зерттеулерін дамытуға арналған. Сондай-ақ, гуманитарлық - ағартушылық қызметі жолында кітапханалық-ақпараттық қамтамасыз етуді жүзеге асырады. Кітапханада өңірдегі педагогикалық бейіндегі оқу және ғылыми ақпараттық ресурстардың баспа және электрондық түрдегі аса ірі топтамасы жинақталған. ППУ ақпараттық ресурстары әмбебап болып табылады, оларды ЖОО студенттері мен оқытушылары ғана емес, сонымен қатар, ЖОО серіктестері саналатын мектептер де пайдаланады.

Бүгінде кітапханаға күн сайын 1000-нан астам оқырман келеді. ППУ ғылыми кітапханасының қызмет көрсету жүйесіне 1 абонемент, 4 оқу залы, электрондық ресурстар залы кіреді. Барлық залдарда интернетке шығатын цифрлық қызмет көрсетудің медиа-аймақтары жұмыс істейді.

2012 жылы Павлодар мемлекеттік педагогикалық институтының ғылыми кітапханасынаға жоғары оқу орнының 50 жылдығына орай белгілі тарихшы, Қазақстан Ғылым Академиясының корреспондент-мүшесі, Павлодар облысының тумасы Ермұхан Бекмаханов есімі берілді.