МАРҒҰЛАН УНИВЕРСИТЕТІНІҢ ТҮЛЕКТЕРІНЕ ДИПЛОМ ТАБЫСТАУ РӘСІМІ ӨТТІ

03.07.2024

Бүгін Ертіс-Баян өңірінің ұстаздар ордасы - Марғұлан университетінің түлектеріне диплом табыстау рәсімі басталды. Естай атындағы қалалық мәдениет сарайында өткен салтанатты шараға Марғұлан университеті Басқарма төрағасы-ректорының міндетін атқарушы Жанбол Жилбаев, басқарма мүшелері, профессор-оқытушылар құрамы қатысып, түлектерді құттықтады.

-Бүгін біз үшін аса маңызды күн. Өйткені осыдан төрт жыл бұрын университет қабырғасын аттаған жас талапкерлерге диплом беріп, үлкен өмір жолына ұшыратын уақыт жетті. Сіздер бүгін барша мамандықтардың ішіндегі ең қадірлісі, адам баласына жол нұсқаушы мұғалім деген мәртебелі мамандықтың иесі болып жатсыздар. Болашақта осы қасиетті қара шаңырақтың қабырғасынан алған білімдеріңізді ұлтымыздың жас ұрпағын оқыту, тәрбиелеу жолына жұмсайды деп кәміл сенеміз.
Жалпы 60 жылдан астам уақыт ішінде Марғұлан университетінен 40 мыңнан астам түлек бітіріп, еліміздің жарқын болашағы жолында аянбай еңбек етіп келеді. Ал биылғы 2024 оқу жылының соңында 1284 түлек бітіріп, қолдарына дипломдарын алуда. Олардың ішінде 1149 бакалавриат болса, 130 түлек магистратураны, 5 адам докторантураны бітірді-деді университет басшысы Жанбол Октябрьұлы.

Биылғы оқу жылының қорытындысы бойынша төрт жыл бойы оқуда, қоғамдық жұмыста белсенділік танытқан 179 түлек үздік дипломмен аяқтады. Олардың ішінде Педагогика жоғары мектебіннен 40, жаратылыстану жоғары мектебін 57 түлек, гуманитарлық ғылымдар жоғары мектебінен 66 түлек, өнер және спорт жоғары 16 түлек үздік дипломмен бітірді. Білім беру бағдарламалары бойынша, ең көп түлек ол - «Дене шынықтыру және спорт»,«Шетел тілі: екі шет тілі», «қазақ тілі мен әдебиеті», Дуальды оқыту нысанында:«Мектепке дейінгі оқыту мен тәрбие»,«Бастауыш білім берудің педагогикасы мен әдістемесі» салаларында екенін ерекше атап өткен жөн.

Осы күні оқу орнымыздың магистратура бөлімінде оқыған жастар да оқуларын тәмамдап, дипломдарын алды. Магистранттарды құттықтап, диплом беру рәсімін басқарма мүшесі - академиялық мәселелер жөніндегі проректоры Ольга Андрющенко, басқарма мүшесі - ғылыми жұмыс жөніндегі проректоры Бауыржан Есенгельдин және жоғары мектеп декандары жүргізді. Өз кезегінде жас түлектерде төрт жыл білім берген ұстаздарына алғыс айтып, қимастықтарын білдірді.

- Мен Жетісу облысының тумасымын. Студенттік шағымның осындай ерекше ортада, тарихы терең университетте өткеніне қуаныштымын. Төрт жыл ішінде үлкен жетістіктерге жеттім. Ең бастысы айнымас адал дос таптым. Өткен жылы оқу орнымыздың қолдауымен Түркия елінде жарты жыл білім алып келдім. Барлық студенттерді өз баласындай көріп, сапалы білім берген ұстаздарыма алғысым шексіз,- дейді Арнұр Қанатбекұлы.
Ендеше барша түлектерді диплом алу рәсімімен шын жүректен құттықтай отырып, алдағы қызметтеріне табыс тілейміз.