МАРҒҰЛАН УНИВЕРСИТЕТІНІҢ СТУДЕНТТЕРІ ӨЗДЕРІНІҢ ЕКІНШІ АНАСЫНДАЙ БОЛҒАН ДӘРІГЕРЛЕРДІ МЕРЕКЕМЕН ҚҰТТЫҚТАДЫ

08.03.2024

Әрбір ұжымда және әрбір мекемеде, соның ішінде оқу орындарындағы дәрігерлер қауымына артылған жауапкершілік өте ауыр. Әлкей Марғұлан атындағы Павлодар педагогикалық университетінде бұл міндетті білікті дәрігер Диана Рахметова мен оның командасы абыроймен атқарып келеді. Бірақ, көбінде ақ халатты абзал жандардың еңбегі тасада қалып жатады. Сондықтан, Марғұлан университетінің белсенді жастары студенттердің денсаулығына алаңдап, әрдайым оларға қамқор болып жүретін дәрігерлер қауымын Халықаралық әйелдер күнімен құттықтап, олардың жұмысымен де танысты.

Жалпы, оқу орнының медициналық пунктіне күніне әртүрлі жағдаймен 40-50 студент келеді екен. Диана Рахметованың басты міндеті - студенттердің денсаулығын қадағалау. Атап айтқанда, алдына келген әрбір студенттің келу себебін анықтап, денсаулығын мұқият тексереді. Соның нәтижесі бойынша қажетті дәрі-дәрмегін жазады я болмаса тиісті медициналық орындарға жолдама береді. Сонымен қатар, университет қызметкерлерінің медициналық құжаттамаларын толықтыру да осы кісілердің еншісінде. Ол ешқашан бір орнында отырмайды. Студенттермен бірге спорттық жарыстарға, емтихандарға және ҰБТ тапсыратын орындарға да барады.

– Дәрігерлік мамандық өте қиын екенін бәрі біледі. Әрбір қоңырауға жылдам жауап беру және дұрыс көмек көрсету маңызды. Медицина саласында жұмыс істеу батылдық пен үлкен жауапкершілікті қажет етеді. Сондай-ақ, адамдарға қамқор, қорған бола алатын үлкен жүрек керек, - дейді Диана ханым. - Біз қарамағымыздағы студенттердің әлі де бала екенін түсінуіміз керек, иә олар үлкен өмірге алғаш қадам басуда. Сондықтан, олар бізге арасында еркелейді, тіпті еркінсиді. Еркеліксіз студенттік өмір-өмір емес!

Ендеше осы үлкен жүкті қайыспай арқалап, үлкен жауапкершілікті шаршамай көтеріп жүрген барша дәрігерлер қауымын және студенттердің екінші анасына айналған Диана Рахметованы аналар мерекесімен құттықтаймыз. Отбасыңызда бақыт пен қуаныш болып, қызметіңіз жемісті болсын!