МАРҒҰЛАН УНИВЕРСИТЕТІНІҢ ОҚЫТУШЫЛАРЫ БАЯНАУЫЛДАҒЫ М.ӘУЕЗОВ ОРТА МЕКТЕБІНЕ БАРДЫ

25.01.2024

Марғұлан университетінің оқытушылары жалпы орта білім беру мектептерімен оның ішіндегі педагогикалық сынып оқушыларымен жиі кездесу ұйымдастырып, кәсіби бағдар беріп келеді. Жақында кәсіби бағдар беру бөлімінің басшысы, қабылдау комиссиясының жауапты хатшысы Гүлнәр Мұсанова, педагогика жоғарғы мектебінің PhD докторы Берік Матаев, филология ғылымдарының кандидаты Әділбек Әміренов, жаратылыстану жоғары мектебінің сарапшы-оқытушысы Е.К.Жетпісбаев Баянауыл ауданы Майқайың кентіндегі М.Әуезов атындағы орта мектепке барды. Іс-сапар барысында университет өкілдері педагогикалық сыныптың шәкірттерімен және 10-11 сынып оқушыларымен кездесіп, «Мамандыққа бір қадам» тақырыбында танымдық сабағын өткізді. Мақсаты - оқушылардың қабілеті мен бейімділігіне қарай кеңес беру, яғни болашақта өздерінің өмірлеріне қажетті мамандық таңдауына қолдау көрсету.

Кездесу барысында оқытушылар «Педагогикалық сынып оқушыларымен TED x форматында пікір алмасу», «Педагогикалық сынып оқушыларымен трениг», «Олимпиада тапсырмаларын орындау тәсілдері», «Ғылыми жобаларды дайындау жолдары» тақырыбында дәріс өткізіп, оқушылардың сұрақтарына жауап берді.