МАРҒҰЛАН УНИВЕРСИТЕТІ КӨРІСУ КҮНІН ТОЙЛАДЫ

14.03.2024

Марғұлан университетінің педагогика жоғары мектебі гуманитарлық ғылымдар, жаратылыстану ғылымдар, өнер және спорт жоғары мектебімен бірлесіп амал мерекесі – көрісу күнін атап өтті.

14 наурыз – әрбір қазақстандық үшін ерекше күн. Бұл күні халқымыз бір-бірімен көрісіп, аман-саулық сұрасып, бұрынғы өкпе-реніштерін кешірісіп, мәре-сәре болып қалады.

Көрісу күнін дәстүрге сай атап өтуде Марғұлан университетінің оқытушылары мен студенттері де шет қалмады. Үлкен қоңырау кезінде олар оқытушылар мен студенттер үшін дәмді дастарқан әзірлеп, шағын концерт ұйымдастырды. Педагогика жоғары мектебі әлеуметтік мәселелер жөніндегі вице-деканы Арай Рахымжанова бастаған әдемі ұлттық киім киген жастар ұстаздарымен және курстастарымен қауышып,мерекемен құттықтады.

Осы күні университет ұжымы ерекше көктемгі көңіл-күймен, мерекелік шаттықпен бір-бірін құттықтап жатты. Жақсылықтың жаршысы бола білген Қыдыр ата да ат басын бұрып, ақ батасын арнады. Үлкендер қауымы дастарқан басында осындай тамаша мерекелік шара үшін жастарға алғыс айтып, кейінгі буынға баталарын беріп, оқуларына табыс тіледі.