МАРҒҰЛАН УНИВЕРСИТЕТІНІҢ ЕКІ СТУДЕНТІ ДЗЮДОДАН ОБЛЫСТЫҚ ЧЕМПИОНЫ АТАНДЫ

26.12.2023

Марғұлан Университетінің бірінші курс студенттері Олжа Төлепберген мен Аида Қалидолла жігіттер мен қыздар арасында дзюдо күресінен өткен Павлодар облысының чемпионатында жеңімпаз атанды.

Татамиде 2004-2005 және 2007-2008 жылы туған 250 спортшы 8 салмақ дәрежесінде ақ және көк түсті кимоно киіп, облыс чемпионы атағын сарапқа салды.

Олжа Төлепберген 60 келі салмақта тамаша өнер көрсетіп, алтын медалге ие болды. Қыздар арасында 63 келі салмақта Қалидолла Аида жеңіске жетті. Олжа Төлепберген – дзюдодан ҚР еңбек сіңірген жаттықтырушысы Денис Николаевич Амелиннің шәкірті.

Аида Қалидолланы Ақсу қаласының №11 балалар мен жасөспірімдер спорт мектебінің еңбек сіңірген спорт шебері, жоғары білікті жаттықтырушы Нұрлан Амангелдіұлы Әбенов жаттықтырады.

Қос спортшы да Қарағанды қаласында өтетін дзюдодан Қазақстан Республикасының чемпионатында облыс намысын қорғайтын болады.