МАРҒҰЛАН УНИВЕРСИТЕТІНІҢ АКРОБАТЫ АЗИЯ ЧЕМПИОНАТЫНДА АЛТЫН АЛДЫ

24.10.2023

Марғұлан Университеті өнер және спорт жоғары мектебінің ДШжС-12 студенті Ілияс Мұхтасаров Ташкенттен олжалы оралды. Ол спорттық акробатикадан ХІІІ Азия чемпионатында бақ сынап, алтыннан алқа тақты. Байқауға Гонконг, Үндістан, Қазақстан, Тәжікстан және Өзбекстан елдерінен 170-тен астам акробат қатысты. Ерлер арасындағы жұпта халықаралық дәрежедегі спорт шебері Ілияс Мұхтасаров Екібастұз қаласындағы №6 мектептің 10-сынып оқушысы Назар Воротелякпен бірге өнер көрсетіп, жеңімпаз атанды.

Жарыстардың қорытындысы бойынша қазақстандық дуэттің Азия чемпионатында теңдесі болмады! «Өзбекстаннан келген жұп өте мықты дайындықпен келіпті және жақсы орындады. Ал біз бүкіл күшімізіді жұмсадық, бұл біздің көрермен алдында көрсеткен ең жақсы жаттығуларымыздың бірі болды деп айта аламыз», – дейді Ілияс.

Спорттық акробатикадан жұптық жарыстар үш жаттығу бойынша өткізілді: тепе-теңдік (статика, тұрақтылық, тепе-теңдік, қозғалыстарды бекіту), вольтиж (лақтыру, айналу, сальто) және аралас (тепе-теңдік + секіру). Ілияс Марғұлан Университетінің «Дене шынықтыру және спорт» ББ 1 курс студенті. Ол Екібастұз қаласындағы «Жасыбай» жасөспірімдер спорт мектебінде жаттыққан.

12 жасынан бастап спорттық акробатикамен айналысып, 2018 жылдан бері серіктесімен жұмыс істеп келеді. Спортшыларды Қазақстан Республикасының спорт шеберлері Айсұлу Исенова мен Нұрсұлу Меңдібаева жаттықтырады. Ілияс Қазақстан Республикасының бірнеше дүркін чемпионы, халықаралық жарыстардың жүлдегері мен жеңімпазы, 2022 жылғы Азия чемпионатының жеңімпазы.