Мәриям Хакімжанованың 115 жылдығына арналған мәнерлеп оқу сайысы

17.11.2021

Павлодар педагогикалық университетінің Е. Бекмаханов атындағы ғылыми кітапханасы Қазақстанның халық ақыны Мәриям Хакімжанованың 115 жылдығына орай «Үлкен азаматтық ой толғайтың ақын» атты мәнерлеп оқу сайысын өткізді.

Бұл кеште қатысушылар мейірімді, майда лепті, жүрегінің сырларын шерткен, жыр меруерттерін төккен, асыл арманға толы ақынның шығармаларын орындады.

Іс-шара барысында қатысушылар ақынның өлеңдерінің көркем бейнесін жасау үшін әртістік шеберліктерін көрсетті. Әділ-қазылар алқасының шешімі бойынша: гуманитарлық ғылымдар жоғары мектебінің студенті Абдіхадир Гулзат І-ші орын, педагогика жоғары мектебінің студенті Ахметова Айдана ІІ-орын, М. Қанапиянов атындағы жоғары колледж студенті Сүндетбек Аншыбек III-ші орынға ие болды.

«Жүрегінің сырларын шерткен, жыр меруерттерін төккен, арманы асыл, жаны пәк, ары таза, төзімді де сезімді, тербеністі ақын еді», - ақын Дихан Әбілев жырлағандай сайысқа қатысқан жастар үш номинациямен марапатталды: «Үздік шешендік қабілеті үшін» Маху Арайлым - гуманитарлық ғылымдар жоғары мектебінің студенті, «Үздік мәнерлеп оқу» Салауатқызы Жансая - педагогика жоғары мектебінің студенті, «Үздік әртістік қабілеті үшін» Болат Аяжан - М. Қанапиянов атындағы жоғары колледж студенті.

Сайыстың әділ-қазылар алқасының төрағасы филология ғылымдарының докторы, профессор Бекен Сағындықұлы, сайыскерлердің өнерлеріне көңілі толып, студенттерге сәттілік тіледі және іс-шараның жас ұрпаққа үлгі-өнеге, тағылымды тәлім-тәрбие беретінін ерекше атап өтті.