МЕЙІРІМДІЛІК ПЕН СЫЙЛАСТЫҚ МЕРЕКЕСІ

03.10.2023

Марғұлан университетінің жастар саясаты жөніндегі департаменті, Педагогика жоғары мектебі, «Жастар рухы» жастар қанаты және «Лотос» еріктілер ұйымы Қарттар күніне орай «Қарттарым – асыл қазынам» атты мерекелік концерт ұйымдастырды.

Студенттер мен ұстаздар ардагерлерді даналық, мейірімділік, құрмет мерекесімен құттықтай барып, ата-әжелердің көңіліне ерекше қуаныш сыйлады. Өнерлі студенттер аға буын өкілдерінің жас кезінде шырқаған сүйікті әндерін орындап, бір серпілтіп тастады.

Студент Маржан Қайырбекова Шәмші Қалдаяқовтың «Арыс жағасында» және Ескендір Хасанғалиевтің «Әдемі-ау» әндерін орындады. Қаршыға Қамаранованың орындауындағы «Жан анам» әні қонақтардың жүрегін тебірентті. Мадияр Әшімовтің орындауындағы әндер тыңдармандардың жүрегінен орын тапты. «Step Up» би тобы да жалынды билерімен көрерменді қуантты.

Мерекелік атмосфера ешкімді бей-жай қалдырмады. Ардагерлер керемет жағымды эмоцияларға ие болып, проблемаларын ұмытып, жандарын тынықтырды. Кездесу соңында аға буын өкілдері студенттер мен ұстаздарға осындай әсерлі кеш үшін алғыстарын білдірді.