ФИНЛЯНДИЯНЫҢ ХАМК УНИВЕРСИТЕТІМЕН ЫНТЫМАҚТАСТЫҚ ТУРАЛЫ МЕМОРАНДУМ

04.03.2022

Павлодар педагогикалық университеті мен Финляндияның Қолданбалы ғылымдар университеті (Häme University of Applied Sciences – HAMK) арасында ынтымақтастық туралы меморандумға қол қойылды. Бірлескен жұмыс ғылыми зерттеулерді, академиялық ұтқырлықты жүзеге асыруды және ең бастысы қос дипломдық білім беруді жүзеге асыруды көздейді.

Академиялық мәселелер бойынша проректор Ольга Константиновна Андрющенко Финляндия университетімен қос дипломдық білім беруді дамыту білім сапасын арттыруға, ұстаздық кәсіптің беделін арттыруға және Еуропаның үздік университеттерімен халықаралық байланыстарды нығайтуға бағытталатынын атап өтті.

HAMK Häme University of Applied Sciences - адам өмірін жақсартуға, технологияға және шығармашылық индустрияға бағытталған жоғары оқу орны. HAMK қолданбалы ғылымдар университеттері (FUAS) федерациясына мүше үш мекеменің бірі болып табылады.

Университет үздіксіз кәсіби білім мен оқытуды ұсынатын Häme Vocational Institute (HAMI)-мен тығыз байланыста жұмыс істейді.

Финляндияның жоғары оқу орындарының сапа жүйелерін Финляндияның білім беруді бағалау орталығы жүйелі түрде қарастырады. HAMK сапа жүйесі бойынша Финляндиядағы ең жоғары «озық» мәртебесін алған алғашқы жоғары оқу орны болды.

HAMK Қолданбалы ғылымдар университетінің оқытушылары Дүниежүзілік банк пен Қазақстан Республикасы Білім және ғылым министрлігінің «Мұғалімдердің білімін арттыру» жобасының сарапшылары болып табылады.