МЕЛЖАН САДЫҚОВ 60 ЖАСТА

07.04.2023

Биыл Ә.Марғұлан атындағы Павлодар педагогикалық университеті оқу өндірістік шеберханасының аға оқытушысы, қолөнер шебері Мелжан Садықов 60 жасқа толды. Бүгін Потанин атындағы тарихи-өлкетану музейінде ұлағатты ұстаздың мерейлі туған күніне арналған мерекелік шара өтті. Оған Марғұлан университетінің ұжымы, өңірімізге белгілі қолөнер шеберлері және ұстаздың шәкірттері қатысты.

- Марғұлан археологиялық орталығының жанында салынған Сұлтанбет сұлтан үй жайына қойылған экспозициялардың көбі Мелжан Рахымсейітұлының қолынан шыққан туындылар. Әлі де үлкен жоспарларымыз бар. Алдағы уақытта бірлесіп жұмыс істейтін боламыз, - дейді "Margulan Centre" археологиялық орталығының қызметкері Еңлік Қабыкенқызы.

Мелжан Садықов ұстаздық еткен жылдары ішінде көптеген шәкірт тәрбиелеп, оң қолынан өнер тамған шеберлерді баулып шығарды. Олардың көбі қазіргі күні білім беру мекемелерінде жұмыс істеп, өздері де шәкірт оқытуда. Тіпті, жеке шеберханасын ашып, ұлттық өнерді кәсіпке айналдырғандар да бар. Сонымен қатар,тағы бір топ оқушысы әртүрлі облыстық, республикалық сайыстарға, көрмелерге қатысып, жүлделі қайтып жүр.

-Өзіңіздей ұстаздың шәкірті болғанымызға мақтанамыз. Сіздің алдыңызда білім алған үш жыл ішінде біздің әкеміздей қамқор болдыңыз, өзіңіздің біліміңіз бен ақыл-кеңесіңізді аямадыңыз.қазіргі күні мектепте жұмыс істеп, өзіңіз шәкірт тәрбиелеп жүрсек те сіздің ақыл-кеңесіңізді сағынамыз. Бүгінгі туған күніңізбен шын жүректен құттықтай отырып, ұзақ ғұмыр тілейміз, - деді шәкірттерінің бірі Нұрхат Жанатұлы.

Шараға өңірімізге белгілі термеші Ерлан Рахымов, әнші Нұрқуат Садығазин қатысып, мерейтой иесіне әсем әнмен шашу шашты. Сонымен қатар, жиналғандар үшін Мелжан шебердің қолынан шыққан авторлық туындылары көрмеге қойылды.