МАЙҚАЙЫҢ КЕНТІНДЕГІ КЕЛЕЛІ КЕЗДЕСУ

07.02.2023

Әлкей Марғұлан атындағы Павлодар педагогикалық университетінің Мансап орталығы, оқытушылары және 4 курс студенттері Майқайың кентінің М.Әуезов атындағы ЖОББМ «Педагогикалық сыныптар» жобасының жұмыс жопарына сәйкес өткізілген «Мектептегі бір күн» облыстық семинарға қатысты.

Семинар мектеп директоры Мажитова Самал Токтасыновна бастаған экскурсия және аудандағы ең алғаш Auezov Media School студиясының салтанатты ашылуымен бастау алды.

Қызықты іс-шара барысында қонақтар назарына ППУ түлектерінің бүгінгі таңда жас мамандардың, тәжірибелі ұстаздармен біріге өткізген сабақтары ұсынылды. Университеттің былтырғы тоғыз түлегі жас маман ретінде осы мектепте жұмыстарын атқаруда, оның ішінде басым бөлігі «Серпін» бағдарламасының түлектері. Университетімізде қамтылған барлық пәндер мен мамандықтар тарапынан көрермендерге тәжірибелік тұрғыдан өте қызықты және назарға тартымды ақпарат ұсынылды.

Тәжірибелік шеберлік сыныптармен қатар, ППУ оқытушылары, «Химия және география» ББ доценті Мұқанова Роза Жүмкенқызы және «Педагогика және психология» ББ 2 курс докторанты Мұхаметқайыров Арсланбек Ерболатұлы 10-11 сынып оқушыларына арнап кәсіптік бағдар беру жұмысын өткізді.

Кәсіптік бағдар беруге арналған кездесу «Қазақстанның болашағы жастардың қолында» атты оқушылар мен студенттер арасындағы дебатпен кезектесті. Дебат сайысы мектеп оқушылары мен университет студенттерінің ой толғамдарымен, түрлі пайымдаулармен талқыланды. Дебаттын нәтижесі ППУ студенттері 1-орын алып ауыспалы кубокка ие болды.

«Мектептегі бір күнді тамашалаған ППУ студенттері Майқайың кентінің М.Әуезов атындағы мектебіне болашақта жас маман ретінде оралатынына сенім білдіреміз және мектеп ұжымына алғысымызды айтамыз», - дейді «Мансап орталығының» басшысы Байтанаева Майра Амангазықызы.

Семинар қорытындысы мектептің сегіз қырлы бір сырлы оқушылары дайындаған мерекелік концерттік бағдарламамен аяқталды.