МАРҒҰЛАН УНИВЕРСИТЕТІНІҢ СПОРТТЫҚ СПАРТАКИАДАСЫ АЯҚТАЛДЫ

27.01.2023

Өткен аптада Әлкей Марғұлан атындағы Павлодар педагогикалық университетінің оқытушылары мен қызметкерлері арасында «Сергектік пен денсаулық» атты спорттық спартакиадасы басталған болатын. Оған әкімшілік, шаруашылық департаменті, педагогика жоғары мектебі, гуманитарлық ғылымдар жоғары мектебі, жаратылыстану жоғары мектебі, өнер және спорт жоғары мектебі, М.Қанапиянов атындағы жоғары колледж командалары қатысты. Спартакиада барысында спорттың 6 түрінен жарыстар болды. Атап айтсақ, қатысушылар тоғызқұмалақ, шахмат, үстел теннисі, баскетбол, волейбол және суда жүзу жарыстары бойынша шеберліктерін көрсетті. Спартакиада университеттің және кәсіподақ ұйымының қаржылай қолдауымен өтті.
Бір аптаға созылған жарыс бүгін аяқталып, жеңімпаздары белгілі болды. Жабылу салтанатына Марғұлан университетінің басқарма төрағасы-ректор Жанбол Жилбаев қатысып, жеңімпаз командаларды құттықтады. Сонымен қатар, жарыстың жоғары деңгейде өтуіне атсалысқан ұйымдастырушыларға, барша қатысушыларға және жанкүйерлерге алғысын білдірді.

- Сонымен біздің университет қызметкерлерінің спартакиадасы аяқталды. Жарыс шахмат, тоғызқұмалақ үстел теннисі, баскетбол, волейбол және жүзу сияқты спорт түрлерінен өтті. Спорттық іс-шараға барлық жоғары мектептер мен құрылымдық бөлімшелердің командалары үлкен ынтамен қатысқанына өте қуаныштымын. Осы күндері өте қызықты жарыстар, нағыз спорттық бәсеке болды. Спорт алаңдары мен залдарда көрермендер арасында да ерекше бәсекелестік болды. Міне, біздің әріптестеріміз ғылымда ғана емес, спортта да мықты екенін көрсетті! Бұл күндері кім жеңіске жеткені маңызды емес. Бастысы, біздің ұжымның достығы мен бірлігі жеңіске жетті, - деді Жанбол Октябрьұлы.
Командалық есеп бойынша М.Қанапиянов атындағы жоғары колледж спортшылары жеңімпаз атанып, спартакиаданың арнайы кубогын өздеріне еншіледі. Ал екінші орын әкімшілік командасына, үшінші орын шаруашылық департаменті командасына бұйырды.

- Жарыс өте қызықты болды. Бір аптаға созылған ойындардың қалай өте шыққанын сезбей қалды. Барлық командалар жақсы дайындықпен келіпті. Әсіресе, мамандықтары, қызметтері спортқа қатысы жоқ оқытушы аға, апаларымыздың спортқа деген қызығушылығы бізді таңырқатты. Олар да спортшылардан қалыспай ойнап, ерекше әсер қалдырды. Алдағы уақытта да осындай жарыстар өтіп тұрса қуана қатысар едік, - дейді колледж оқытушысы ДаниярМүшетов.
Сонымен қатар, ойын барысында ерекше шеберлігімен және белсенділігімен көзге түскен жеке ойыншылар да марапатталды. Олардың марапаттарын университет кәсіподақ ұйымының төрағасы Роза Жаева табыстады. Атап айтсақ, әкімшілік командасының ойыншысы Жаслан Узыканов «Ең белсенді ойыншы», гуманитарлық ғылымдар жоғары мектебінің командасынан Әділбек Әміренов «Ең адал ойыншы», колледж құрамасының мүшесі Юлия Сүтжанова «Ең үздік ойыншы», Жұмабике Шапкенова «Ең үздік жетекші» номинацияларымен марапатталды.

Барлық жеңімпаздар мен жүлдегерлерге және үздік ойыншыларға кубок пен медальдер және ақшалай ынталандыру сыйлықтары берілді.